Войти на сайт
Логин:
პაროლი:
რეგისტრაცია  :  დაგავიწყდა პაროლი?  :  დახურვა
Рекомендуем так же посмотреть фильмы и не забудьте о шаблоны dle на нашем ресурсе скачать аниме у нас на портале
ჩვენს შესახებ მოგვწერეთ კონტაქტი

შოთა მურღულიას მერობის ორი წელი-Topnews.com.ge-ს ექსკლუზიური ინტერვიუ

თარიღი : 15-06-2016, 20:49 | კატეგორია: ახალი ამბები, მთავარი თემა, ინტერვიუ   
topnews.com.ge
ორი წლის წინ, ადგილობრივი თვითმმართველობის არჩევნების შედეგად, ქუთაისში, ქალაქის პირველი პირების რეკორდული სისწრაფით ცვლის პრაქტიკა დასრულდა. ქუთაისელი ამომრჩევლის დაახლოებით 52%-მა არჩევანი კოალიცია "ქართული ოცნების" მერობის კანდიდატის, შოთა მურრულიას სასარგებლოდ გააკეთა.
როგორ აფასებს 2-წლიან საქმიანობას და რამდენ ქულას უწერს საკუთარ თავს, რას საყვედურობს წინამორბედებს, რამ გააკვირვა ქუთაისში, რატომ უწუნებს ოპოზიციას კვალიფიკაციას, რაზე თქვა უარი მერობის პერიოდში, როგორ აპირებს ქუთაისის ღირსების დაცვას და როგორ წარმოუდგენია ქალაქის განვითარება პერსპექტივაში?- ამ და სხვა კითხვებზე შოთა მურღულია Topnews.com.ge-სთან ინტერვიუში პასუხობს.

ბატონო შოთა 2 წელი გავიდა, რაც ქუთაისის არჩეული მერი ხართ. არჩევნების დღეს თქვენ ხმა მიეცით თბილისში. ამ ორი წლის განმავლობაში გახდით ქუთაისის მოქალაქე?
სიმართლე გითხრათ, არ მიმიცია ხმა თბილისში. ბოლო პერიოდში აქეთ ვიყავი. დილას წავედი, რაღაც პროცედურული თემები მქონდა. მე ვარ ქუთაისელი. ვინმე კითხვას სვამს, მე ვარ თუ არა ქუთაისელი? თუ რეგისტრაციის ადგილი აინტერესებთ? რა მნიშვნელობა აქვს რეგისტრაციის ადგილს. მე ფაქტიური მისამართი მაქვს ქუთაისში. ვცხოვრობ ქუთაისში. ალბათ ამ ორი წლის განმავლობაში ორი ღამე იქნება, რაც თბილისში მაქვს განათევი. მომავალ არცევნებზე ხმას ქუთაისში მივცემ.

ვიდრე ქუთაისის მერი გახდებოდით, მანამ ქუთაისში იყო ასეთი რეალობა: მერები ტოვებდნენ თანამდებობებს და ინიშნეოდნენ მერის მოვალეობის შემსრულებლები. კომიკური სიტუაცია იყო ქალაქში და შესაბამისად, ქუთაისიც იუმორისტული შოუებისთვის ერთ-ერთი მთავარ თემას წარმოადგენდა. ორი წელია არ გვქონია ცვლილება ამ კუთხით. რაშია საქმე?
ჯადოშია საქმე. რა თქმა უნდა, სასაცილო სიტუაცია იყო შექმნილი. აქ არ არის ვინმე ერთ პიროვნებაზე საუბარი. მთლიანად ქალაქს აყენებდა შეურაცხოფას. ყველა ადამიანი უნდა ეცადოს პატივი სცეს ქალაქს, რომელიც უყვარს. ეს არ საჭიროებს არანაირ პოლიტიკურ კუთვნილებებსა და არანაირ თანამდებობებს. სამწუხაროდ, ქალაქში რეალობა იყო ისეთი, რომ ეს პოლიტიკური სიტუაცია დასაცინად ხდიდა ჩვენს ქალაქს. ანეკდოტები დადიოდა ქალაქთან, მის მმართველობასთან დაკავშირებით. ზოგადად, ბევრი ადამიანი სამწუხაროდ, მაშინაც და ახლაც რაღაც საქილიკოდ მიიჩნევს ამ ქალაქს და თითქოს პოლიტიკოსად მოაქვს თავი. მე არ მჯერა არცერთი პოლიტიკოსისა და არც ერთი ადამიანის, ვინც თავის ქალაქს შეურაცხყოფას მიაყენებს, ვინც თავის ქალაქს დასაცინად გახდის. ამიტომ, ჩვენ ყველამ, მიუხედავად პოლიტიკური კუთვნილებისა, უნდა ვეცადოთ, რომ ქალაქის ღირსება დავიცვათ. ეს არაფერში არ უნდა გავცვალოთ, მათ შორის არც რაღაც პოლიტიკურ ქულებში. მაშინ იყო ასეთი სიტუაცია, რომ ადამიანები დროებითი პოზიციის მისაღებად ყველაფრის მკადრებლები იყვნენ. რა თქმა უნდა, ნაწილი და ამას ყველაზე ვერ ვიტყვი. წინა ხელისუფლებამ დაიწყო მომხვეჭელობა და გადავიდნენ აბსოლუტურად სხვა ჭრილში და აბსოლუტურად არ იკარებდნენ არავის, ვისაც შეეძლო მათ ბიზნეს ინტერესებს შეხებოდა. თვენახევარი საკმაო მუშაობა დამჭირდა, დაგვერწმუნებინა საკრებულოს წევრთა ნაწილი, რომ ეს არ იყო სწორი მიდგომა და სწორი მიდგომა არის ქალაქის სიყვარული და ქალაქის განვითარება. ჩვენ თვე ნახევარში შევძელით უმრავლესობა შეგვექმნა იმ საკრებულოში. ამ ადამიანებმა როგორც კი ეს იგრძვნეს, რადიკალური ნაბიჯიც გადადგეს და მე თანამდებობიდან გამათავისუფლეს. სიტუაცია დასტაბილურდა და არჩევნებს თავისუფლად შევხვდით. ჩვენ საერთოდ არ გამოგვიყენებია ადმინისტრაციული რესურსი. ჩემი ამოცანა იყო არჩევნებს ჩაეარა წყნარად და არ ყოფილიყო არც ერთი პოლიტიკური სპეკულაცია. არჩევნებმა აბსოლიტურად დემოკრატიულად ჩაიარა. მე ჩემი მაშინდელი ფუნქცია შევასრულე და მე დავასტაბილურე სიტუაცია. მაშინ შევძელი, რომ ყველა პოლიტიკურ პარტიას კანონის ფარგლებში ეწარმოებინა წინასაარჩევნო კამპანია. 2014 წელს ჩვენ გავედით პირველ ადგილას თვითმმართველობის არჩევნებში. ამის შესაძლებლობა მანამდე განხორციელებულმა ცვლილებებმა მოგვცა. უკვე შემდგომ პერიოდში სტაბილურობა გამოიწვია საკანონმდებლო ცვლილებამაც, რომელიც რეგიონალური განვითარებისა და ინფრასტრუქტურის სამინისტროს მიერ იქნა შემუშავებული. 2 წელია, რაც მე ქუთაისის მერი ვარ და ვთვლი, რომ ეს არ არის ცოტა დრო. წარმოიდგინეთ, რა მდგომარეობაში იყო ქალაქი, რომ 2-წლიანი მერობა ითვლება ხანგრძლივ პერიოდად.

ბატონო შოთა რა განსხვავებას ხედავთ იმ ქუთაისს შორის, რომელიც 2 წლის წინ ჩაიბარეთ და იმ ქუთაისს შორის, რომელიც დღეს, ორი წლის შემდეგ გვაქვს?

ქუთაისი ახლა არის ერთ-ერთი პოლიტიკურად ყველაზე სტაბილური ქალაქი. საკრებულო, მერია არის ურთიერთპატივისცემაზე დამყარებული და ურთიერთთანამშრომლოზე. არ ყოფილა არც დებოში და არც სპეციალურად რაიმეს ჩაგდების მცდელობა. ქუთაისში, რომელიც მე ჩავიბარე, იყო ასეთი გავრცელებული ფრაზა, რომ არაფერი არ კეთდება. ახლა ვართ ისეთ სიტუაციაზე, რომ ბევრი რამე კეთდება, ოღონდ ტემპი არ მოგვწონს. ქუთაისში ვერავინ იტყვის, რომ არ კეთდება. რომელ ქუჩაზეც არ უნდა გავიდეთ, გადათხრილია ყველგან. რატომ? იმიტომ, რომ აბსოლუტურად იცვლება წყლის სისტემა. ეს არის ყველაზე ძვირი და ძალიან ჭუჭყიანი საქმე, მაგრამ ამის გარეშე შეუძლებელია. ვერავინ გაბედა, რომ მიწისქვეშა კომუნიკაციები შეეცვალა ქუთაისში. რატომ? ჯერ ერთი ძალიან დიდი თანხები იყო საჭირო და მეორეც, პოლიტიკურადაც დიდად ქულების მომტანი არაა იმიტომ, რომ დისკომფორტს ქმნის სხვადასხვა უბნებში. ტემპი რიგ შემთხვევაში მეც არ მომწონს. ის, რაც ქალაქის დაკვეთაა-ტენდერის გამოცხადება და თანხის მოძიება ცენტრალურ ხელისუფლებაში, ერთი დღით არ დაგვიანებულა. ყველაზე ადრე დაწყებული ტენდერებით 2 წელია საქართველოში პირველ ადგილზე ვართ. ამხელა სამუშაოს სამწუხაროდ, კომპანიები მომზადებული ვერ შეხვდნენ. ამხელა სამუშაოები ქუთაისში არ ჩატარებულა. იმ კომპანიებს, რომელთაც ეს საქმე აქვთ აღებული, ძალიან უჭირთ, რადგან ნელ-ნელა იძენენ გამოცდილებას. ჩვენ გვინდა ერთიანად განვვითარდეთ. მეც მინდა, ჩემზე მეტად არავის ეჩქარება, მაგრამ პატარა ბავშვს ვერ დაავალებ დიდ საქმეს. მერიის მხრიდან ყველა ტენდერი ჩატარებულია, ყველა ხელშეკრულება გაფორმებულია. ერთადერთი- კომპანიებმა უნდა შეასრულონ. მირჩევნია, ხშირ შემთხვევაშინ ერთი თვით გვიან დასრულდეს, მაგრამ ხარისხიანად გაკეთდეს. კიდევ მეტია გასაკეთებელი. მთავარია, ჩვენ შევძელით ქუთაისის ინფრასტრუქტურისათვის 500 მილიონი ლარი გამოყოფილიყო. ეს შევძელით ცენტრალურ ხელისუფლებასთან სწორი თანამშრომლობით. ჩემს წინამორბედებს დიდად ვერ ვსაყვედურობ იმიტომ, რომ მათ არ ჰქონდათ ფული და მათ გადასაწყვეტ საქმეს სხვა წყვეტდა.
ქუთაისის თვითმმართველობა იმართებოდა ზუსტად ისე, როგორც 1980 წელს. საბჭოთა პერიოდიდან არაფერი შენაცვლელი არ იყო. რატომ უნდა იმართებოდეს ქალაქი დიდი დოკუმენტებითა და ხელწერილებით? არც ერთი ელექტრონული პროგრამა არ იყო 21-ე საუკუნეში. დაახლოებით 3 საათიდან 3 საათნახევრამდე მერს ხელმოწერებისათვის სჭირდებოდა. ახლა კი ეს ელექტრონულად წამებში კეთდება. ჩვენ მივიღეთ ISO სერტიფიკატი, რომლითაც დავუსვით წერტილი ყველანაირ კითხვას მართვასთან დაკავშირებით. ზოგი უვიცობას ავლენს, რომ აგერ ორმოა და როგორ მიიღე ISO სერტიფიკატიო. სერტიფიკატი აფასებს მენეჯმენტში რამდენას სწორი პოზიციები გაქვს დალაგებული.

რა უნდა ახსენდებოდეს ხალხს შოთა მურღულიას სახელის გაგონებაზე?

ჯერ გეტყვით, თუ რა არ უნდა ახსენდებოდეს. არ უნდა ახსენდებოდეს ცოცხი, არ უნდა ახსენდებოდეს გაუპატიურებული პატიმრები, არ უნდა ახსენდებოდეს დაჩაგრული ადამიანი. ესაა ჩემი პრინციპი და არ უნდა ახსენდებოდეს, რომ ქალაქის მერმა იცის ყველაფერი და სხვამ-არაფერი. ჩემი სურვილია, რომ ხალხს ახსენდებოდეს ძალიან ბევრი სამუშაო-სიჩქარის შემზღუდველი კუნძული, ახალი შუქნიშანი, აღმაშენებლის გამზირის, თამარ მეფის ქუჩის რეაბილიტირება, გელათის, ქუთაისის ძველი შემოსასვლელის აღდგენა, ნიკეა, რეაბილიტირებული ფოლკლორის სასახლე, ნიღბების თეატრი.

ბატონო შოთა, რას იტყვით ოპოზიციაზე? რამდენად ახერხებენ ოპოზიციური პარტიები შესაბამის ოპონირებას?
იმდენად სუსტია ოპოზიციური ძალა, რომ ჩვენ განვითარებაში ცოტა ხელს გვიშლის. კარგი, ჯანსაღი კრიტიკა გვაიძულებს, რომ განვვითარდეთ, თუმცა ოპოზიცია საერთოდ ვერ ქმნის კრიტიკას. ბიუჯეტში ცვლილებები შედის, თუმცა კითხვა არ აქვთ ან ტყუილს ამბობენ. საერთოდ ვერ წევენ ოპონირებას ან ტყუილს ამბობენ. მაგალითად ის, რომ შოთა მურღულიამ ბიბლიოთეკები გაყიდა. 2008 წელს გაუუქმებიათ ბიბლიოთეკები და გადმოიტანეს გასასხვისებელი ობიექტების ნუსხაში. ამ ბრალდებას კი მიყენებს "ნაციონალური მოძრაობის" წევრი. ჩემს პერიოდში არც ერთი ბიბლიოთეკა არ დახურულა, არც ერთ ბიბლიოთეკაზე სტატუსი არ შემიცვლია. პირიქით, თანხა მოვიძიე და ახალ, 2 მილიონნახევრიან ბიბლიოთეკას ვაშენებთ უნივერსიტეტის ეზოში. მეორე მხრივ მომწონს, რომ რეალური ვერაფერი ნახეს და რაღაც მითებს თხზავენ.

ადგილობრივი ხელისუფლება ქუთაისის განვითარების გეგმას-"ქუთაისი 2020"-ს ამუშავებს. როგორ წარმოგიდგენიათ ქალაქის ფუნქცია და მისი განვითარება პერსპექტივაში?

ქუთაისის განვითარების გეგმაში განისაზღვრა ის მიმართულებები, რაც საქალაქო დასახლებისათვის არის მნიშვნელოვანი. გამოიკვეთა შვიდი მიმართულება. საერთოდ არ უნდა იყო ჩახედული საქმის არსში რომ იფიქრო, ქალაქს რომელიმე ერთი ფუნქცია განავითარებს. როგორ შეიძლება 3 500 წლოვან ქალაქს ერთი ფუნქცია ჰქონდეს. ქუთაისი საბჭოთა კავშირის ბოლო პერიოდში ყველაზე მდიდარი იყო. ძირითად ინდუსტრიაზე იყო დამოკიდებული. საბჭოთა კავშირის დაშლამ საქართველოში ქუთაისი ყველაზე მეტად გააღარიბა, რადგან ის მხოლოდ ერთ მიმართულებაზე იყო დამოკიდებული. ქალაქს სჭირდება სხვადასხვა მიმართულებით გაძლიერება და ეს ერთიანად მოიტანს განვითარებას. მიმართულებებს შორის რამდენიმე იქნება წამყვანი. ის, რაც ეკონომიკურ დოვლათს შექმნის და სოციალურ პრობლემატიკას მოაგვარებს. რა თქმა უნდა, საჭიროა ინფრასტრუქტურის მოწესრიგება, მაგრამ ჩვენი ისტორია შექმნა დიდმა მუსიკოსებმა, დიდმა მმართველებმა. ქუთაისი არის ფალიაშვილის, ბალანჩივაძის ქალაქი. ეკონომიკის სფერო ბევრ მიმართულებად იყოფა: ეს არის მომსახურეობის სფერო და წარმოება. მომსახურება არანაკლებად მნისვნელოვანი სფეროა. ტურიზმი ეკონომიკურად საკმაოდ შემოსავლიანია, რადგან სხვა ეკონომიკიდან შენს ეკონომიკაში შემოვიდა თანხა. ბოლო პერიოდში 20%-ით გაიზარდა იმ მგზვავრების რაოდენობა, რომლებიც აეროპორტმა გაატარა. ქალაქში ბევრი ტურისტი შეინიშნება. შენდება სასტუმროები, მოდის საინვესტიციო დაინტერესებები დიდ პროექტებზე, მაგრამ ეს ერთი მიმართულებაა. უმნიშვნელოვანესია სამედიცინო ბიზნესი. ჩვენ ვართ რეგიონის ცენტრი და დასავლეთის წამყვანი ქალაქი. არ არსებობს კვარტალი, რომ ახალი სამედიცინო დაწესებულება არ გაიხსნას ქუთაისში, რადგან ის მარტო ქუთაისს კი არა, არამედ მთლიანად რეგიონს ემსახურება. ქალაქში შესაძლებლობა ეძლევა ადამიანს, რომ არა მხოლოდ თბილისში მიიღოს კვალიფიციური მომსახურეობა, არამედ ქუთაისშიც. ერთი ასეთი დაწესებულება დაახლოებით 250-300 ადამიანს ასაქმებს.

შემდეგი მიმართულებაა ქუთაისი, როგორც სავაჭრო ცენტრი. მე-19 საუკუნეში ქუთაისში წამყვანია ვაჭრობა. ქალაქში რამდენიმე ბრენდული მაღაზია გაიხსნა და ეს მნიშვნელოვანია. რა თქმა უნდა, არ იყო სასიამოვნო, რომ ამხელა ქალაქში ცალკე ბრენდული მაღაზია არ გვქონდა. მახსოვს გამაკრიტიკეს, რა არის ქალაქის მერი "ვაიკიკის" გახსნაზე როგორ მივიდაო. რაც გაიხსნება, მივალ და წარმატებას ვუსურვებ. ერთმა მაღაზიამ 60 ადამიანი დაასაქმა. მე მას მადლობას ვეტყვი და თუ რამე შემეძლება, ხელსაც შევუწყობ. ქუთაისში გაიხსნა "გორგია"-ს ძალიან დიდი სავაჭრო ცენტრი. გაიხსნა "იდეალი"," კოტონი". მარტო ამ დაწესებულებებში დაახლოებით 300-400 ადამიანი დასაქმდა. ჩემთვის ეს მნიშვნელოვანი და კარგია.

ჩვენ შედარებით პრობლემა გვაქვს წარმოებაში. წარმოებასთან დაკავშირებით იყო პრობლემები, რაც დაიძრა და ტემპი უნდა აკრიფოს. ქარხანას მერია ვერ გაუშვებს, ეს კერძო პირმა უნდა გააკეთოს. თუ კერძოს სჭირდება მიწის ნაკვეთი, სახელწიფო უფასოდ აძლევს, ოღონდ რაღაც პირობების დაცვით, გახსენი და გააკეთე. გადასახადები რეგიონშიც და ალბათ ევროპაშიც ყველაზე დაბალი გვაქვს. ბიუროკრატია მინიმუმადეა დაყვანილი. ბიზნესმენს არავინ არ თხოვს რომელიმე ფონდში ჩარიცხოს თანხა ან ვინმეს მანქანა უყიდოს.

ჩვენ ყოველთვის ვცდილობთ კარგი სამსახური გვქონდეს, მაგრამ არ მოგვდის აზრად, რომ ჩვენ გავხდეთ დამსაქმებლები. აქ კი მეტი რისკის გაწევა და მეტი ფიქრი გვიწევს. უფრო მეტი კვალიფიკაციაა საჭირო ბიზნესში. ინდუსტრიულ ზონაში უკვე საკმაოდ კარგი მიმართულებები წამოიწია. ახალი მეტალურგიული ქარხნის აშენებაზე არის საუბარი. აშენდება ასევე, ლიფტების ქარხანა.

დღეს საქალაქო თემატიკაზე 4 300 ადამიანია დასაქმებული, როდესაც ცენტრალურ ხელისუფლებას დასაქმებულო ჰყავს დაახლოებით 7 000 ადამიანი.
პარლამენტმა ქუთაისის ადმინისტრაციული ფუნქცია გააძლიერა, თუმცა რაღაც ერთი მიმართულება ვერ გადაარჩენს ქუთაისს.

განათლება ყველა ქალაქის განვითარებისათვის არის მნიშვნელოვანი. ასეევე, მნიშვნელოვანია სახელმწიფოს მიერ შეთავაზებული უფასო ფაკულტეტების პროექტი. არის სპეციალობები, საადც კვალიფიციურ კადრს ეძებენ, 10 ადგილია და 2 სპეციალისტი მოიძებნება. მერიაშიც იყო ადგილები, სადაც კონკურენცია არ ფიქსირდებოდა. ჩვენ უნივერსიტეტთან გვაქვს მჭიდრო თანამშრომლობა, რომ კიდევ უფრო გაძლიერდეს და გაღრმავდეს პროფესიული მიმართულებები.
ქუთაისში ძალიან დიდი საუნივერსიტეტო ქალაქის მშენებლობაზეა ლაპარაკი. ახალი უნივერისტეტის გაჩენა კიდევ უფრო გააძლიერებს ქუთაისს. ჩვენ ახლა ტარტუსტან დამეგობრების პროცესში ვართ. ჩვენ რომ ქალაქს საუნივერსიტეტო ქალაქი დავარქვათ, მოსახლეობსი დაახლოებით 20% უნდა იყოს სტუდენტი, თუმცა რთულია ქუთაისს მარტო საუნივერსიტეტო ქალაქი დაარქვა, რადგან უცხოეთში საუნივერსიტეტო ქალაქები არის დიდ ქალაქებთან არსებული პატარა დასახლებები.
შეიძლება ვინმემ თქვას, რომ 2020 წლამდე ამ ყველაფრის მიღწევა ძალიან ამბიციურია. ჩვენ ამ დრომდე ყველა ამ თემის დაძვრას და კონკრეტულ დონემდე მიყვანას ვცდილობთ.

ბატონო შოთა, ქუთაისის მერიასთან არსებული ა(ა)იპები ყოველთვის იყო კრიტიკის საგანი. საუბარი იყო იმაზე, რომ აიპებს არ ჰქონდათ ფუნქცია და მხოლოდ შტატების გასაბერად არსებობდა. ბოლო პერიოდში ბაღების აიპები აღმოჩნდა ყველაზე ხმაურიანი. საუბარი იყო როგორც პოლიტიკური ნიშნით თანამშრომელთა გათავისუფლებაზე, ისე ბაღებში უხარისხო საკვების შეტანაზე და ასე შემდეგ. რეალურად რა ხდება ამ სისტემაში?
რა არის იმაში გაუგებარი, რომ ბაგა-ბაღების გაერთიანება ცალკე დაწესებულება უნდა იყოს. თბილისში ყველა ბაღს ცალკე ბუღალტერი ჰყავს და ასე შემდეგ. ვფიქრობ, ქუთაისში უკეთესადაა. ადმინისტრაციული ხარჯი რომ დაზოგილიყო, სჯობდა ერთი ორგანიზაცია ყოფილიყო ფილიალებით, ერთი ბუღალტრითა და ერთიანი შესყიდვებით. ერთიანი შესყიდვები გვაძლევს საშუალებას ნაკლებ ფასად შევიძინოთ პროდუქტი.

შემიძლია გითხრათ, რომ ალბათ ამ ბავშვების 80%-ს სახლში უკეთესი საჭმელი შეიძლება არ ჰქონდეთ. ჩვენ ამ მიმართულებით სერიოზული ნაბიჯები გადავდგით. ქუთაისში იყო ორჯერადი კვება. წინა ხელისუფლების დროს დილით ბავშვი რომ მივიდოდა ბაღში, ეტყოდნენ ითამაშეთო. ამას ეუბნებოდნენ 10 000 ბავშვის მშობელს. ზოგი ვერ ასწრებდა, ზოგს შეიძლება არც ჰქონდა. პირადად ჩემი გადაწყვეტილება იყო, რომ ბაღები ორჯერადიდან გადასულიყო სამჯერად კვებაზე და გაუმჯობესებულიყო რაციონი. დაახლოებით მილიონი ლარით მეტი იხარჯება ბავშვების კვებაზე ახლა, ვიდრე ადრე იხარჯებოდა. მახსოვს, გამოვიდა ბაღის ყოფილი გამგე სამსახურიდან გათავისუფლების შემდეგ და თქვა, რომ ბაღებში კვება იყო საშინელი. მისი ბავშვი საჯარო ბაღში დადის, ისევე როგორც ჩემი. როგორ გგონიათ, ჩემი შვილი არ მიყვარს? იმას გავრისკავ, რომ ბავშვი მოიწამლოს? თუ კვების მხრივვ ერთი შეცდომა მაინც მოხდა, აქ მხოლოდ ერთი ბავშვი არ დაზარალდება. ბოლო ორი წლის განმავლობაში ბავშვის მოწამვლის ფაქტი არ დაფიქსირებულა, რადგან ზედმიწევნით სრულდება ის მოთხოვნები, რაც უსაფრთხოებასთან და პროდუქტის ხარისხთანაა დაკავშირებული. რაც შეეხება საკვების შეძენას, ტენდერით ხდება. რა თქმა უნდა მოთხოვნაა, რომ იყოს მაღალი ხარისხის და ძალიან ხშირად ლაბორატორიული კვლევებიც ტარდება. თუ შენი შვილიც იგივეს ჭამდა და ცუდი იყო, რა ნამუსი გაძლევდა იქ გაჩერების საშუალებას?

რაც შეეხება ააიპში გაბერილ შტატებსა და ნეპოტიზმს, ვერ ვიტყვით რომ გვყავს ბევრი მასწავლებელი. ყველა ჯგუფს ჰყავს ერთი მასწავლებელი. ერთადერთი, რაც გავაკეთეთ იყო ის, რომ მეორე ცვლის პედაგოგი დავამატეთ, რადგან არ შეიძლება ბავშვს გადაღლილი მასწავლებელი ასწავლიდეს.

წელს ორი ახალი ბაღი გავხსენით, მესამეს ვხსნით და მიშენებებიც გავაკეთეთ. რჩება ადმინისტრაცია. ბაღების ააიპში დასაქმებული 1600 ადამიანიდან ადმინისტრაციაში შეიძლება იყოს 20 ადამიანი. მიუხედავად ამისა, მივიღეთ გადაწყვეტილება და კიდევ შევამცირეთ შტატები ადმინისტრაციაში.

არსებობს სტანდარტი, რომლის მიხედვითაც შეიძლება გაკეთდეს შეფასება. რამდენი პროცენტი იხარჯება საქმეზე, რამდენი ადმინისტრირებაზე. თუ ადმინისტრირება არის 10-15% ეს ნიშნავს, რომ რაციონალურია. ამინისტრირება ბაღების გაერთიანებაში 10% ნაკლებია და აბსურდია იქ რაიმეს გაბერვაზე ლაპარაკი.
თუ ვახსენებთ ა(ა)იპის მართველს ნანა ლორთქიფანიძეს, დიახ მე ლორთქიფანიძე დავაწინაურე. კი ბატონო, ნანა ლორთქიფანიძე არის ჩემი ნათელ-მირონი, მაგრამ მე არ დამიწყებინებინა მისთვის მუშაობა. ცხრა წელი იმ სისტემაში იყო და რა თქმა უნდა, ჩემთვის სანდო პიროვნებაა. ამ სისტემაში 4 300 ადამიანი მუშაობს და რა თქმა უნდა, დაახლოებით ათამდე სანდო ადამიანი მყავს. მაგალითად, კალათბურთის გუნდის პრეზიდენტი ასევე არის ჩემი მეგობარი, რომელიც დაახლოებით 15 წელია კალათბურთის მწვრთნელია. მან შეძლო და თასი გვიდევს, ქუთაისი კალათბურთში ჩემპიონი პირველად გახდა. თურმე მამაჩემი მერიაში მე დავასაქმე. მამაჩემი ჩემამდე მუშაობდა აქ. გამოდის, რომ მე მოსვლამდე 5 წლით ადრე დავასაქმე მამაჩემი მერიაში.

ყველაზე ცოტა ა(ა)იპი ჰყავს ქუთაისს. მაგალითად გვყავს "სპეციალური სერვისები", რომელსაც ბოლო დროის განმავლობაში შვიდი ახალი ფუნქცია დაემატა. ჩვენ ერთს ვუმატებთ ფუნქციებს, რადგან არ შევქმნათ ახალი ა(ა)იპი, რომელსაც ახალი ბუღალტერი დასჭირდება. ჩვენ უნდა ვაკრიტიკოთ ადმინისტრაცია, თორემ მუშა რომ უნდა აიყვანო საქმის გასაკეთებლად, ამაში რა არის გასაკვირი. დირექტორს 17 მოადგილე რომ არ უნდა ჰყავდეს, ეს ცნობილია. მაგალითად, მე 2 მოადგილე მყავს. ჩემამდე ქუთაისის მერს ჰყავდა ოთხი მოადგილე. 19 სამსახური იყო ქუთაისის მერიაში, ახლა არის 8. ა(ა)იპებთან დაკავშირებული თემა მიმაჩნია, რომ არის გაზვიადებული და ქუთაისი არის პირველი, რომელმაც ა(ა)იპის ადმინისტრაციაში დაიწყო ტესტირებები. როგორც მერიაში მინდა იყოს ძალიან მაღალი კვალიფიკაციის ადამიანები და ამას მივაღწიე დიდწილად ასევე, მინდა სხვა აიპებშიც მაღალი კვალიფიკაციის ადამიანები მუშაობდნენ.

ქვეყანაში პოლიტიკური ამინდის შექმნაში ძალიან დიდი როლი უჭირავთ მედიასაშუალებებს. ქუთაისში არსებული მედიასაშუალებები რამდენად ობიქტურად აშუქებენ მოვლენებს და რა შეგიძლიათ თქვათ მედიის მუშაობაზე?

არ არსებობს ქუთაისში მოვლენა, რომელიც არ გაშუქდეს. მედიის რაღაც ნაწილს ჰგონია, რომ ცუდის დაწერა კარგია. თუმცა არა, საინტერესოს დაწერაა კარგი. რა თქმა უნდა, მედიასაშუალებამ არ უნდა მოიტყუოს. ქუთაისში მედია ძალიან აქტიურია. ერთხელ ვთქვით, რომ ჟურნალისტებისათვის ხომ არ გავაკეთოთ და დავგეგმოთ ტრენინგ-კურსები-თქო, თუმცა დიდი გამოხმაურება მოჰყვა და თქვეს, რომ კვალიფიკაცია დაგვიწუნაო. რა იყო ამაში გასაკვირი. მე და ჩემი თანამშრომლებიც გავდივართ ტრენინგებს. ჩვენთვის გაცილებით უფრო საინტერესოა, როცა ისეთი ადამიანი გისვამს კითხვებს, რომელმაც თემა იცის. ჩვენ ნებისმიერ მედიასაშუალებასთან ვცდილობთ მაქსიმალურ თანამშრომლობას.

თქვენ ისაუბრეთ იმ რთულ გაზაზე რაც გაიარეთ. რა იყო ისეთი გადაწყვეტილება რომელიც სარისკოდ გეჩვენებოდათ, დიდხანს იფიქრეთ, მაგრამ შემდეგ გაამართლა?
როცა მერის მოვალეობის შემსრულებლად დავინიშნე, წინა საკრებულომ დამიდო დოკუმენტი ხელმოსაწერად, რომლითაც ვითომ ჩატარებული კონკურსით, წინასწარ განსაზღვრული სიებით დადგენილი იყო ვინ სად დაინიშნებოდა. პირველი პრინციპული გადაწყვეტილება იყო ის, რომ მთლიანად ჩავშალე ის კონკურსი. ამან გამოიწვია დიდი დაპირისპირება და ჩემი მოხსნაც. ქუთაისის მერია იმ ჩაშლილი და ახლად გამოცხადებული კონკურსის შემდგომ დაკომპლექტებულია საუკეთესო კადრებით, საქართველოში ყველაზე მაღალი ქულა აქვთ ნაჩვენები გამოცდებში თანამშრომლებს. ამ ადამიანებით შევძელით ჩვენ, რომ საუკეთესო მენეჯმენტში მიგვეღო ISO. მერია კიდევ საჭიროებს რეფორმების გატარებას. სერიოზული რეფორმა სჭირდება არქიტექტურას. ერთი თვის წინ საჯარო სივრცე გაიხსნა და კიდევ უამრავი სიახლე იქნება. ჩვენ ვცდილობთ პირველობას.

და ბოლოს, შოთა მურღულია ათბალიანი სისტემიდან რამდენით შეაფასებს თავის საქმიანობას?
თვითშეფასება ყოველთვის სუბიექტურია. არსებობს რამდენიმე კრიტერიუმი. რა შემეძლო, რა იყო შესაძლებელი იმ პერიოდში. თავისი თავით კმაყოფილი ადამიანი ბევრს ვერაფერს მიაღწევს. მგონი, ის რაც შესაძლებელი იყო ამ ორ წელიწადში- ქალაქის დასტაბილურება, დასაცინი თემების სრულად მოხსნა, დიდი თანხის შემოტანა ქალაქში- მე ეს შევძელი. ვერ შევძელი ერთი-ორი რეფორმის გატარება იმიტომ, რომ საზოგადოებაში არასწორი აღქმა არ ყოფილიყო. ახლა ვნანობ. ალბათ ათიდან 8-ბალიანი სისტემით შევაფასებდი. 10 იდეალურია და ადამიანმა თავის თავს არ უნდა დაუწეროს.

ესაუბრა ნათია სვანიძე


ნანახია: 2047-ჯერ

მსგავსი სიახლეები
საჯარო განხილვა 18 აგვისტოს, ხუთშაბათს, 14:00 საათზე, თვითმმართველობის სხდომათა დარბაზში გაიმართება.
იმერეთის მთავარი საინფომაციო სააგენტო topnews.com.ge დაინტერესდა, მიიღეს თუ არა პოლიტიკურმა პარტიებმა აღნიშნული დოკუმენტი და
რუბრიკა "ჩემი არჩევანი" წარმოგიდგენთ "ერთიანი ნაციონალური მოძრაობის" ქუთაისის მაჟორიტარობის კანდიდატს, 49-ე ოლქში, გიორგი
Topnews.com.ge გთავაზობთ ინტერვიუს სხვადასხვა პოლიტიკური პარტიის ლიდერებთან.
მეფარიშვილის განცხადებით, ქალაქს განვითარებისთვის სხვა ფუნქცია უნდა მოეძებნოს და არა საპარლამენტო ქალაქის სტატუსი.
ეროვნული მოძრაობის წევრები სამხედროს გადატრიალებისას დაღუპული ადამიანების მკვლელობების გამოძიებას და მათთვის, ისევე როგორ მათი ოჯახის წევრებისასთვის, სტატუსის
'ქუთაისის ა(ა)იპ მადლიერების სახლში ბენეფიციართა მომსახურება ჩვეულებრივ რეჟიმში გრძელდება,' - ინფორმაციას ამის შესახებ მერიის პრესსამსახური ავრცელებს.
მირზა გამეზარდაშვილი ამბობს, რომ შახტში აფეთქების შესახებ ინფორმაცია სიცრუეა. ოჯახი გამოძიებას ენდობა და მის შედეგებს ელოდება.

ამინდი