ჭიათურის სოფელ ხრეითში სამართალდამცავებმა 72 წლის მამაკაცს სახლში 'ლიმონკა' უპოვეს

ჭიათურის სოფელ ხრეითში სამართალდამცავებმა 72 წლის მამაკაცი სახლში ნაპოვნი "ლიმონკის" მიზეზით დააკავეს. ინფორმაციას ჟურნალისტი ეკა კვესიტაძე ავრცელებს.

"დააკავეს ჩემი 72 წლის ბიძა ბადრი ლოლაძე, რომელიც არის მარტოხელა, ავადმყოფი, სოციალურად დაუცველი. სახლი აქვს ნახევრად დანგრეული მიწისძვრისგან, ამიტომ ჩემი და პატრონობს და ზამთრობით თავის სახლში აცხოვრებს თბილისში.

რამდენიმე კვირაა, რაც დათბა და სოფელში წავიდა სიმინდის და ლობიოს მოსაყვანად. ასე ცხოვრობს წლებია. დღეს დილით პატრულის ორი ეკიპაჟი დაადგა სახლში. დაბზარულ კედლებს შორის ძველი, დაჟანგული ლიმონკა იდოო. განყოფილებაში გადაიყვანეს და 72 წლის კაცი იზოლატორში გამოკეტეს. რომ ეთქვა, მამაჩემის იყო ეგ ლიმონკა, არ დავაკავებდითო. მაგრამ უარყოფს ჩემი არ არისო. ახლა ვზივარ და თავს ვიტეხ, რატომ შეიძლებოდა დაეკავებინათ 72 წლის კაცი და ჩემი თავის გარდა სხვა მიზეზს ვერ ვპოულობ,"-წერს კვესიტაძე.