ქუთაისში, ნიკეას ქუჩაზე არსებული სოციალური საცხოვრისი შესაძლოა სხვა შენობაში განთავსდეს

ქუთაისის მერი იოსებ ხახალეიშვილი ნიკეას ქუჩაზე მდებარე სოციალური საცხოვრისის ბენეფიციარებს შეხვდა. მერის თქმით, ადგილობრივი ხელისუფლებისთვის კარგად არის ცნობილი ის პრობლემები, რაც მათ აწუხებთ.

"აქამდეც არაერთხელ გვისაუბრია ამ საკითხებზე და შესაბამისი ქმედითი ღონისძიებებიც გვაქვს გატარებული.

საცხოვრისის შენობას უკვე ჩაუტარდა რეაბილიტაცია, რომლის ფარგლებშიც მთლიანად შეკეთდა სახურავი.
მოსახლეობასთან შეხვედრის დროს შევთანხმდით, რომ ახლა იმ დაზიანებებსაც მოვაგვარებთ, რაც ამ ეტაპზე აქვთ შენობის შიდა სივრცეში.

პარალელურად, შენობაში არსებული სხვა ინფრასტრუქტურული პრობლემების მასშტაბის გათვალისწინებით, ჩვენ ინტენსიურად ვმუშაობთ საქართველოს მთავრობასთან საკითხის გადაწყვეტის ალტერნატიულ გზებზე, მათ შორის, აქტიურად განიხილება საცხოვრისის ახალ შენობაში განთავსებაც.

საცხოვრისში მცხოვრებ მოქალაქეებს მივაწოდეთ კონკრეტული და სანდო ინფორმაცია აღნიშნულის თაობაზე და აქტიურ კომუნიკაციაზე შევთანხმდით,"-ამბობს მერი.