ონის ტყეში, ‘წითელ წიგნში’ შეტანილი დათვის მკვლელობის ფაქტზე გამოძიება მიმდინარეობს

ონის სოფელ უწერის ტყეში, “წითელ ნუსხაში” შეტანილი დათვის მკვლელობის საქმეზე გამოძიება მიმდინარეობს.

ონის მერის, სერგი ხიდეშელის თქმით, ფაქტზე დაწყებულია ერთობლივი საგამოძიებო მოქმედებები შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის ონის რაიონული სამმართველოსა და გარემოს დაცვისა და სოფლის მეურნეობის სამინისტროს სსდ - გარემოსდაცვითი ზედამხედველობის დეპარტამენტის დასავლეთის რეგიონული სამმართველოს მიერ.

“ასეთი ბარბაროსული დამოკიდებულება დანაშაულია და პირს სისხლის სამართლის პასუხისმგებლობასთან ერთად, დაეკისრება გარემოსთვის მიყენებული ზიანის თანხის ანაზღაურებაც.

საქართველოში ნადირობის წესებს არეგულირებს კანონი „ცხოველთა სამყაროს შესახებ.“ კანონის თანახმად, ნადირობა დაშვებულია მხოლოდ სპეციალურად გამოყოფილ ტერიტორიებზე, ხოლო წითელი ნუსხით დაცულ მურა დათვზე ნადირობა აკრძალულია მთელი ქვეყნის მასშტაბით,”-ამბობს სერგი ხიდეშელი.