ხარაგაულში ორი სოფლის დამაკავშირებელ გზას რეაბილიტაცია უტარდება

ხარაგაულში, ღორეშა-ბაზალეთის დამაკავშირებელი გზის 11 კილომეტრიანი მონაკვეთის რეაბილიტაცია დაიწყო. მუნიციპალური განვითარების ფონდის დაკვეთით, სარეაბილიტაციო სამუშაოებს აზერბაიჯანული კომპანია „თიჯარეთის ფილიალი საქართველოში“ ასრულებს.

ღორეშა-ბაზალეთის ინფრასტრუქტურული პროექტი გზაზე ცემენტბეტონის, სანიაღვრე არხებისა და წყალამრიდი მილების მოწყობას ითვალისწინებს.

ამ ეტაპზე, პირველადი სამუშაოებისთვის მიმდინარეობს ქვიშა-ხრეშის შეტანა და გარკვეულ მონაკვეთებზე გაშლა.

სახელშეკრულებო ვადებით 11 კმ. გზის მშენებლობა 2017 წლის ზაფხულზე დასრულდება.

შეგახსენებთ, რომ ხარაგაულიდან ბაზალეთის მიმართულებით 3 კმ. გზა უკვე მოასფალტებულია,ხოლო უბისიდან ღორეშის ადმინისტრაციულ ცენტრამდე 5 კმ. გზის მონაკვეთი - მობეტონებული.

ღორეშა-ბაზალეთის გზის სრული რეაბილიტაციის შემდეგ, ხარაგაული (ბაზალეთი-სარგვეში ღორეშა-უბისის მიმართულებით) თბილისი-ლესელიძის ცენტრალურ ავტომაგისტრალს 21 კილომეტრიანი მობეტონებული გზით დაუკავშირდება.
NS