უნიკალურობით ცნობილი სოფელ ძეძილეთში მდებარე სათევზიის კარსტული მღვიმე

იმერეთის მთავარი საინფორმაციო სააგენტო Topnews.com.ge (გაიგე მთავარი იმერეთში) თსუ-ს ასისტენტ პროფესორ გიორგი დვალაშვილთან ერთად, იმერეთის რეგიონში არსებულ იმ საინტერესო ადგილებს გაგაცნობთ, რომლებიც რეგიონში განხორციელებული ექსპედიციების შედეგად აღმოჩნდა. ამჯერად ხონის მუნიციპალიტეტის სოფელ ძეძილეთში მდებარე მღვიმეზე გიამბობთ.


სათევზიის კარსტული მღვიმე მდებარეობს ზღვის დონიდან 235 მეტრზე, მდინარე ცხენისწყლის მარცხენა ნაპირზე, ხონის მუნიციპალიტეტის სოფელ ძეძილეთში. გამომუშავებულია ცარულ კირქვებში. პერიოდული წყლიანი მღვიმის ქვედა სართული დამარხულია მდინარე ცხენისწყლის რეგრესიული აკუმალაციით შექმნილი ალუვიონით. მღვიმის თანამედროვე შესასვლელი მდინარე ცხენისწყლის მაღალი გამოზიდვის კონუსის დროსაც ალუვიონით იყო ამოქოლილი. საწყისი მონაკვეთი სამხრეთ- აღმოსავლეთისაკენაა მიმართული, რომელიც 120 მეტრის შემდეგ მკვეთრად უხვევს აღმოსავლეთისაკენ. შუა ნაწილში 12 მეტრი სიღრმის კარსტული ჭა არის ჩამოყალიბებული, რომლის ფსკერი სიფონურ ტბას უკავია. მომდევნო 100 მეტრის სიგრძის დერეფანი გაუვალი ნაპრალით იხშობა, ფსკერის ფართობი დაახლოებით 2600 მ-ია, ხოლო მღვიმის საერთო მოცულობა 7100 მ.



სათევზიის კარსულ მღვიმე სტატიურია. ის პერიოდული ნაკადების მოქმედების ზონაში იმყოფება. მღვიმის ბოლო მონაკვეთში მცირე სიღრმის რამდენიმე ტბაა შეგუბებული. ძირითადად ადვილი გასავლელია. ტერიტორია გამოკვლეულია გეოგრაფ კარლო ლიფონავას მიერ 1985-1986 წლებში. სპელეოლოგებისა და მედიკოსების მიერ დადგინდა მისი უნიკალურობა, როგორც ბუნებრივი ძეგლის ისე სამკურნალო თვალსაზრისით. მღვიმის დარბაზებში უხვადაა სტალაქტიტები, სტალაგმიტები, ტბები და სხვა.

"მღვიმისკემ მისასვლელი გზა იწყება მდინარე ცხენისწყალზე არსებულ ბონდის ხიდიდან, მდინარე ცხენისწყლის მარცხენა მხარეს, რამდენიმე ადგილას მიწისქვეშა მდინარე გამოედინება, შემდეგ გზა მიემართება მშრალ ხეობაში, სადაც საინტერესო კირქვული რელიეფია, ერთ მონაკვეთზე წარმოდგენილია თაღოვანი ბუნებივი ხიდი, სადაც დაახლოებით 0,5 მეტრი სიმაღლის და 1 მეტრი სიგანის მდინარის მშრალი კალაპოტია წარმოდგენილი. მდინარის მშრალ ხეობაში ასებული ბილიკის სიგრძე დაახლოებით 100 მეტრს შეადგენს, მღვიმის შესასვლელთან შეინიშნება ნგრეული კირქვები, რომელიც გეოლოგიურ წარსული აქტიური სეისმური მოვლენებით და ძლიერი მდინარეული ნაკადების მოქმედებით უნდა იყოს წარმოდგენილი. მღვიმეში შესვლისას აუცილებლად უნდა იყოს გათვალისწინებული კლიმატური ფაქტორები. წვიმიანი ამინდის შემთხვევაში როგორც მღვიმემდე მისასვლელი მშრალი ხეობა, აგრეთვე თვითონ მღვიმის ჩასასვლელი საშიშია, ვიზიტორებისთვის გასათვალისწინებელია მღვიმეში მოძრაობის უსაფრთხოების წესები," - ამბობს გიორგი დვალაშვილი.