ძეგლთა დაცვის მინისტრმა და იმერეთის გუბერნატორმა გეგუთის სასახლის კომპლექსში მიმდინარე სამუშაოები დაათვალიერეს

საქართველოს კულტურისა და ძეგლთა დაცვის მინისტრმა მიხეილ გიორგაძემ, იმერეთის გუბერნატორმა გივი ჭიჭინაძემ, ქუთაისის მერმა შოთა მურღულიამ და წყალტუბოს მუნიციპალიტეტის გამგებელმა კონსტანტინე მამისეიშვილმა, გეგუთის სასახლის სარეაბილიტაციო ინფრასტრუქტურული სამუშაოები დაათვალიერეს.

ამ ეტაპზე გეგუთის კომპლექსის მიმდებარე ტერიტორიაზე არქეოლოგიური გათხრები მიმდინარეობს. ასევე, არქოლოგიური ცენტრი და საიტი ეწყობა.

ივნისსა და ივლისში გეგუთის სასახლის რეაბილიტაციის პირველი ეტაპი დაიწყება, რომელიც არქეოლოგიურ სამუშაოებს გულისხმობს. მეორე ეტაპი კი, რომელიც აღმოჩენილი მასალების კვლევას მოიცავს, აგვისტოდან სექტემბრის ჩათვლით გაგრძელდება.

ცნობისთვის, გეგუთის სასახლის კომპლექსთან 2015 წელს შუშის კონსტრუქცია დამონტაჟდა, რომელიც დამთვალიერებელს საშუალებას აძლევს, ძეგლი პირვანდელი სახით, პერსპექტივაში აღიქვას. გამოყენებული ტექნოლოგია საქართველოში უნიკალურია. ძეგლზე აგრეთვე დამონტაჟდა გარე განათება.

კულტურის მინისტრმა, იმერეთის გუბერნატორმა და კულტურული მემკვიდრეობის დაცვის ეროვნული სააგენტოს წარმომადგენლებმა ასევე, გელათის მონასტერი მოინახულეს, სადაც რამდენიმე წელია სარეაბილიტაციო სამუშაოები მიმდინარეობს.