მუსიკალური ჯგუფი ვანიდან 'ოქროს ტალღაზე' წარსდგება

ვანის მუნიციპალიტეტში არსებული ჯგუფი „არგო“ „ოქროს ტალღაზე“ მიიღებს მონაწილეობას. ის კონკურსზე ორი ნომინანტი სიმღერითაა წარდგენილი. ერთია დუეტი ლაშა რამიშვილთან – „წამის მეასედი“, ხოლო მეორე სოლო სიმღერა-„ადამიანო“.

,,ძალიან მოხარულები ვართ, რომ ჩვენი ორი სიმღერა ნომინანტებს შორისაა. ერთია დუეტი ლაშა რამიშვილთან, რომლის მუსიკა ჯგუფს ეკუთვნის, ტექსტი კი ვანო კორძაძეს, „ადამიანო“-სთვის მელოდია ასევე ჩვენი შექმნილია, ტექსტი კი – ქრისტინე ბახტაძის გახლავთ. კარგია, რომ ამ კონკურსით სოლო შემსრულებლებსა თუ ანსამბლებს თავის წარმოჩენის საშუალება ეძლევათ. ყველას აქვს შესაძლებლობა, საზოგადოებას კარგად გააცნოს საკუთარი ნამუშევარი. ნებისმიერი მუსიკოსისთვის ეს დიდი სტიმულია,"-აცხადებს ჯგუფი "არგოს" წევრი გიგა ბუბუტეიშვილი.

ცნობისთვის, მეოთხე წელია, რაც ვანის მუნიციპალიტეტში არსებული მუსიკალური ჯგუფი ''არგო'' მსმენელს საკუთარ შემოქმედებას სთავაზობს. თემა თავისუფალია და ჯგუფის შემოქმედება რომელიმე კონკრეტული სტილითა თუ მიმდინარეობით არ შემოიფარგლება. ჯგუფში ათი მუსიკოსია, რომელთა სურვილია, რომ რეპერტუარი ფართო მასებზე გათვლილი და სასიამოვნო მოსასმენი იყოს.