ქუთაისის წერეთლის უნივერსიტეტში ინოვაციური იდეების შექმნაზე იმუშავებენ

ქუთაისის აკაკი წერეთლის სახელმწიფო უნივერსიტეტში (თამარ მეფის N59) პროექტი ATSUHACK_ი იწყება. აღნიშნული პროექტი სასწავლებლის სტუდენტური თვითმმართველობის საინიციატივო ჯგუფის მიერ, FABLAB_ATSU, IHUB თბილისის, საქართველოს ინოვაციების და ტენოლოგიების სააგენტოსა და ადგილობრივი თვითმმართველობის მხარდაჭერით იმართება.

პროექტის მიზანს თანამედროვე ტექნოლოგიების განვითარების პროცესში ახალგაზრდების ჩართვა და მათთვის შესაძლებლობების გამოვლენაში ხელის შეწყობა წარმოადგენს.

პროექტი, რომელიც 17 ივნისს, 12:00 საათზე დაიწყება, 19 ივნისს დასრულდება და მასში მონაწილეობას დაახლოებით 100 ადამიანი, როგორც ინდივიდუალური, ისე გუნდური ფორმით მიიღებს. მონაწილეები 48 საათის განმავლობაში ახალი ინოვაციური იდეების შექმნაზე იმუშავენ, ხოლო დავალების შესრულების დროს მონაწილეები უნივერსიტეტის ტერიტორიაზე მათთვის სპეციალურად აღჭურვილ სივრცეში განთავსდებიან, რომლის დატოვების უფლება (განსაკუთრებული შემთხვევების გარდა) მათ არ ექნებათ. შესვენებების დროს სპეციალურად მოწვეული სპიკერები წინასწარ განსაზღვრულ თემატიკაზე ჩააატარებენ ლექციას.

ჯგუფებისთვის სამუშაოდ მიცემული 48 საათის ამოწურვის შემდეგ, თითოეული გუნდი პრეზენტაციის სახით წარადგენს საკუთარ ნამუშევარს.

პროექტს ეყოლება სამი გამარჯვებული გუნდი, რომელსაც გამოავლენს ჟიური. შესაბამისად გადანაწილდება საპრიზო ფონდი 8 000 ლარი (I - 4000 ლარი, II - 2500, III - 1500 ლარი).

პროექტის სპონსორები Microsoft-ი და მაკნატუნა არიან, ხოლო გენერალურ სპონსორს VTB ბანკი წარმოადგენს.