საია წინასაარჩევნო პერიოდში არსებულ დარღვევებს შეისწავლის

საიას ქუთაისის ოფისმა მედიისა და არასამთავრობო ორგანზაციების წარმომადგენლებს განხორციელებული და მიმდინარე პროექტების შესახებ ანგარიში წარუდგინა.

მიმდინარე წელს ორგანიზაცია საპარლამენტო არჩევნების მონიტორინგს ახორციელებს, რომლის ფარგლებშიც მთელი ქვეყნის ტერიტორიაზე წინასაარჩევნო გარემოსა და წინასაარჩევნო კამპანიის მიმდინარეობაზე დაკვირვება ხდება.

როგორც საიას ქუთაისის ოფისის წარმომადგენლები აცხადებენ, საარჩევნო მიმართულებით ორგანიზაცია ორ ახალ პროექტს ახორციელებს. ეს არის სისხლის, ადმინისტრაციული საქმეების მონიტორინგი და პოლიტიკურად აქტიური პირების მიმართ წარმათული პროცესები.

"აღნიშნული პროექტები შექმნილია იმისათვის, რომ არჩევნებში მონაწილე პარტიებმა დაიცვან საარჩევნო აგიტაციის წესები და საარჩევნო კოდექსი. ასევე, განხორციელდეს ბიუჯეტის მონიტორინგი," - აცხადებენ ორგანიზაციაში.

საიას ქუთაისის ფილიალის თავმჯდომარემ გიორგი სანტურიანმა წყალტუბოს მუნიციპალიტეტში ჩატარებული შუალედური არჩევნები შეაჯამა. მისი თქმით, არჩევნებზე რაიმე არსებითი დარღვევა არ გამოვლენილა. როგორც სანტურიანი ამბობს, წყალტუბოში ორი საჩივარი დაიწერა და ორივე დისციპლინარული სახის, რომლებიც თავმჯდომარესა და მდივანს ეხებოდა.

ორგანიზაციის წარმომადგენლები მედიასა და არასამთავრობო ორგანიზაციებს მიუწოდებენ წინასაარჩევნოდ გამოვლენილი შესაძლო კანონდარღვევების შესახებ საიას ქუთაისის ოფისს დაუყოვნებლივ მიაწოდონ ინფორმაცია.