პროფესიონალ და მოყვარულ მრბოლელებს მარტვილში რბოლაზე იწვევენ

მიმდინარე წლის 28 მაისს, მარტვილში, მარტვილის მუნიციპალიტეტის გამგეობის მიმდებარე ტერიტორიაზე, წყვილთა რბოლაში 2016 წლის იმერეთის პირველობის II ეტაპი ჩატარდება. ღონისძიების ორგანიზატორი ავტო-მოტო კლუბი „იმერეთი“-ა.

ღონისძიება, რომელშიც მონაწილეობას მოყვარული და ლიცენზირებული მრბოლელები მიიღებენ, 11:00 საათზე დაიწყება, ხოლო მანამ, 10:00 საათიდან მონაწილეთა რეგისტრაცია მოხდება.

ავტო-მოტო კლუბ „იმერეთის“ პრეზიდენტის ნიკა სვანიძის თქმით, გამარჯვებულებს საწვავის ტალონები, სასაჩუქრე ვაუჩერები, ფასდაკლების 1-წლიანი ბარათები და ძრავის ზეთები გადაეცემათ.

რაც შეეხება ღონისძიების სპონსორებს, სპონსორებს ხორცპროდუქტების კომპანია „ექსტრა მითი“ და ქუთაისში, ჭავჭავაძის ქუჩაზე მდებარე ავტო ნაწილების მაღაზია წარმოადგენენ.

„ღონისძიების მიმდინარეობისას მაქსიმალურად იქნება დაცული წესრიგი და დისციპლინა. წყვილთა რბოლაში იმერეთის პირველობის მეორე ეტაპს მხარს უჭერს მარტვილის მუნიციპალიტეტის გამგეობა და საქართველოს საავტომობილო ფედერაცია,” - აცხადებს ნიკა სვანიძე.