"სტუდენტისთვის მხოლოდ გამოცდა და ლექცია არ უნდა იყოს უნივერსიტეტი, სტუდენტს უნდა ჰქონდეს ლამაზი ცხოვრება"

4 წელია, რაც ქუთაისის აკაკი წერეთლის სახელმწიფო უნივერსიტეტში "სახელოვნებო კვირეული " ტარდება. კვირეულის ფარგლებში სასწავლებელში სხვადასხვა ღონისძიება იმართება, რომელშიც სტუდენტებთან ერთად, ლექტორ-მასწავლებლებიც არიან ჩართული.

მიმდინარე წელს 3 მაისიდან 13 მაისამდე წერეთლის უნივერსიტეტში და მის გარეთ ათამდე ღონისძიება ჩატარდა. მოეწყო პოეზიის საღამო, გაიმართა თეატრალური დასის სპექტაკლი, ანსამბლ "კოლხა"-სა და "ადილას" კონცერტები და სხვა ღონისძიებები.


დახურვის დღეს აწსუ-ს მთავარ ფოიეში უნივერსიტეტის დიზაინისა და ტექნოლოგიის დეპარტამენტის სტუდენტთა და პედაგოგთა მოდელების ჩვენება მოეწყო.



"ეს კვირეული უკვე ტრადიციად იქცა და სიამაყით მინდა აღვნიშნო, რომ ყოველწლიურად ღონისძიებები უფრო მრავალფეროვანი ხდება. სტუდენტისთვის მხოლოდ გამოცდა და ლექცია არ უნდა იყოს უნივერსიტეტი, სტუდენტს უნდა ჰქონდეს ლამაზი ცხოვრება და ჩვენ ყველანაირად ვცდილობთ ხალისიანი გავხადოთ ეს პერიოდი,"- განაცხადა აკაკი წერეთლის სახელმწიფო უნივერსიტეტის რექტორმა გიორგი ღავთაძემ.

კვირეული ქუთაისის სახელმწიფო სიმფონიური ორკესტრის კონცერტით დაიხურა, აქტიურ მონაწილეებს კი მადლობის სიგელები გადაეცათ.

მარუსა ხურციძე