ზესტაფონში, ფეროს თანამშრომლების დაგეგმილ აქციაზე 5 კაცი მივიდა

ზესტაფონში, ფეროშენადნობი ქარხნის თანამშრომლების მიერ დაანონსებული აქცია-გაფიცვა ვერ გაიმართა.

ქარხნის თანამშრომლებს სამსახურის შენარჩუნების, ხელფასების გაზრდისა და ზეგანაკვეთური სამუშაო საათების შესაბამისი ანაზღაურების მოთხოვნით, აქციის გამართვა დღეს ჰქონდათ დაგეგმილი, თუმცა 1 800 ადამიანის ნაცვლად, აქციაზე მხოლოდ 5 ადამიანი შეიკრიბა.

"ადამიანები დააშინეს და უთხრეს, რომ თუ აქციაზე გამოვიდოდნენ, სამსახურს დაკარგავდნენ. დღეს ისეთი ცხოვრებაა, რომ სამსახურის დაკარგვა ყველას ეშინია. დღევანდელი აქცია-გაფიცვის მთავარი მოთხოვნა იყო, რომ ჭიათურის მაღაროების მსგავსად, ზესტაფონის ფეროშენადნობი ქარხანაც არ დახურულიყო. მე პირადად, იმის გამო, რომ ქარხანაში არ შევსულიყავი და თანამშრომლებისთვის აქციაზე გასვლისთვის არ მომეწოდებინა, სამსახურში შესასვლელი ე.წ. გასაღებიც კი დამიბლოკეს“, - აცხადებს აქციის მონაწილე კახა მაჩიტიძე.

ბრალდებებს „ჯორჯიან მანგანეზის“ საზოგადოებასთან ურთიერთობის სამსახურის უფროსი ზაქარია ზალიკაშვილი ეხმაურება. მისი თქმით, ფეროშენადნობქარხანაში დასაქმებული არც ერთი თანამშრომლის გათავისუფლება არ მომხდარა.

რაც შეეხება დაანონსებულ აქციას, ის აქციის ჩატარების მიზეზს ვერ ხედავს და აცხადებს, რომ ქარხანა არ დაიხურება.