მიმართვა გარემოს დაცვის მინისტრს ქუთაისიდან-იყავით უფრო სერიოზულები

არასამთავრობო ორგანიზაცია "ევროპა ჩვენი სახლიას" დამფუძნებელი თორნიკე ბარათაშვილი გარემოს დაცვის მინისტრს გიგლა აგულაშვილსა და გარემოს ეროვნულ სააგენტოს მიმართავს. ბარათაშვილი მათგან, ქუთაისში, "ოქროს ჩარდახის" მიმდებარე ტერიტორიაზე კაფე "არგოს" მშენებლობის საკითხით დაინტერესებას ითხოვს. არასამთავრობო ორგანიზაციის წარმომადგენელი თავის მიმართვას ვერეს ხეობის ტრაგედიის შესახებ გიგლა აგულაშვილის განცხადებას ურთავს.

„არ არის სასურველი ჭალაში, მდინარის ორივე ნაპირზე, გაშენდეს რაიმე, მშენებლობა ამ ტერიტორიაზე ჩვენი სპეციალისტების მიერ არ არის რეკომენდებული.''–გიგლა აგულაშვილი ვერეს ხეობის შესახებ.

"ბატონო გიგლა!

ქუთაისის მერიის ნებართვით, რასაც სააავტომობილო გზების დეპარტამენტიც ეთანხმება, რიონის ხეობაში, ისტორიულ ცენტრში "ოქროს ჩარდახის" სიახლოვეს მიმდინარეობს კაფე-ბარის "არგო" მშენებლობა.

რიონი გაცილებით უფრო მკაცრი და წყალუხვი მდინარეა, ვიდრე-ვერე. პერიოდულად ახასიათებს წყალმოვარდნა, რომლის დროს აღნიშნული ტერიტორია წყლით იფარება.
მიიღეთ ზომები, რომ ვერეს ტრაგედია ქუთაისში არ განმეორდეს. მერიის წარმომადგენელმა კითხვაზე, ვინ აიღებს ტრაგედიის შემთხვევაში პასუხისმგებლობას, ასეთი პასუხი გაგვცა: "ღმერთმა ნუ ქნას!" მერიაში ჯიუტობენ!

იყავით უფრო სერიოზულები და გაამართლეთ სამინისტროს და შესაბამისი დეპარტამენტების არსებობა," - აცხადებს თორნიკე ბარათაშვილი.