კულინარიული ფესტივალი ქუთაისში

„გვირილობის“ აღნიშვნამ მუხრანის ტყეში გადაინაცვლა, სადაც იმერეთის რეგიონის თორმეტმა მუნიციპალიტეტმა თავისი კუთხის ტრადიციული კერძები წარმოადგინა.

მრავალფეროვან სამზარეულოსთან ერთად, ქართველი და უცხოელი დამთვალიერებლები იმერეთის კუთხეების კულტურასა და ტრადიციებსა გაეცნენ.

სტუმრებთან და მუნიციპალიტეტების გამგებლებთან ერთად, ქუთაისს რეგიონული განვითარების მინისტრი ნოდარ ჯავახიშვილიც სტუმრობდა.

ღონისძიებაზე დღის განმავლობაში სხვადასხვა ტრადიციული ცეკვა, ასევე, ხალხური და ფოლკლორული სიმღერები შესრულდა,ხოლო ნაციონალურ ტანსაცმელში გამოწყობილმა ადამიანებმა მსვლელობა მოეწყვეს.

მუხრანის ტყეში სხვადასხვა მუნიციპალიტეტის მიერ ინდივიდუალური და მრავალფეროვანი ხელნაკეთი ნივთებიც იყო გამოფენილი. მათ შორის: თექით დამუშავებული ნამუშევრები, ნახატები, ხელნაკეთი აქსესუარები და ხის ნივთები.

„მინდა, მოგილოცოთ დღევანდელი დღე, რომელსაც მე პირველად ვესწრები. ძალიან კარგია, როცა ადამიანებს აქვთ საშუალება გაზაფხულის მშვენიერ დღეებში შეიკრიბონ და იზეიმონ გვირილობის დღესასწაული. სიხარული და გამარჯვება მინდა ვუსურვო მთელ საქართველოს და გამორჩეულად კი იმერეთს,“-განაცხადა რეგიონული განვითარების მინისტრმა ნოდარ ჯავახიშვილმა.

ღონისძიებაზე ქუთაისის მერი შოთა მურღულია და გუბერნატორი გივი ჭიჭინაძე, ასევე ქალაქის საკრეებულოს თავმჯდომარე დავით დვალი და დეპუტატები იმყოფებოდნენ.

„დღევანდელი დღე იყო ერთ-ერთი გვირგვინი „გვირილობის“ დღესასწულისა იმდენად, რამდენადაც იმერეთის ყველა მუნიციპალიტეტი მონაწილეობდა მასში და ყველამ წარმოაჩინა თავისი თავი სამზარეულოთი და თვითშემოქმედებით. ძალიან ლამაზი და მშვენიერი დღე გამოგვივიდა,"--განაცხადა იმერეთის გუბერნატორმა გივი ჭიჭინაძემ.

გთავაზობთ ფოტოკოლაჟს ღონისძიებიდან.








მარუსა ხურციძე