ჭიათურაში გამოჩენილი ქართველი კომპოზიტორის ვარსკვლავი გაიხსნა

ჭიათურის კულტურის ცენტრში მამია ხატელიშვილის ხსოვნისადმი მიძღვნილი საღამო გაიმართა. ღონისძიებაზე გამოჩენილი ქართველი კომპოზიტორი, ლოტბარი და შემსრულებელი გაიხსენეს. საღამოზე მამია ხატელიშვილის შექმნილი და შესრულებული სიმღერები თბილისიდან მოწვეულმა ანსამბლმა „იმერმა“,ქუთაისის უმაღლესი სამუსიკო კოლეჯის კვარტეტმა და ადგილობრივმა ანსამბლმა „ჩანგმა“ შეასრულეს.

ღონისძიებას ჭიათურის მუნიციპალიტეტის გამგებელი სულხან მახათაძე, მაჟორიტარი დეპუტატი მალხაზ წერეთელი და ადგილობრივი ხელისუფლების სხვა წარმომადგენლები ესწრებოდნენ. გამგებელმა და დეპუტატმა დარბაზში შეკრებილ საზოგადოებას სიტყვით მიმართეს და მამია ხატელიშვილის ღვაწლზე ისაუბრეს. კონცერტის ბოლოს, ცნობილი ლოტბარის შვილიშვილმა,გიორგი ხატელიშვილმა ბაბუის უკვდავი სიმღერა: „კარგი ხარ გოგოვ, კარგი ხარ" შეასრულა და მაყურებლის ოვაცია დაიმსახურა.

ღონისძიების დასრულების შემდეგ, კულტურის ცენტრის წინ მამია ხატელიშვილის ვარსკვლავი საზეიმოდ გაიხსნა.