ქუთაისში დევნილები მათი ეზოს დაცვას 24-საათიანი მორიგეობით გეგმავენ

ქუთაისში იძულებით გადაადგილებული პირების საპროტესტო აქცია მიმდინარეობს. აქციას ჭავჭავაძის გამზირზე არსებულ კორპუსებში მცხვორები დევნილები მართავენ. აქციის მონაწილეები მათ კორპუსთან ახალი მშენებლობის დაწყებას აპროტესტებენ და აცხადებენ, რომ შენობის აშენების შემთხვევაში მათი კორპუსები ეზოს გარეშე რჩება.

"არ ვიცით ვინ აშენებს ან რა შენდება. დღეს მოვიდნენ და გვითხრეს, მშენებლობა უნდა დავიწყოთო. მესერი რომ გაავლეს, ჩვენს კორპუსს ეზო საერთოდ აღარ დარჩა. მთელი ღამე, 24-საათიან რეჟიმში ვიმორიგევებთ, რომ მშენებლობა ღამით არ განაახლონ. სამუშაოების დაწყების ულებას არ მივცემთ,"- აცხადებენ დევნილები.

ქუთაისის მერიაში ამბობენ, რომ ისინი მიმდინარე მშენებლობის შესახებ საქმის კურსში არ არიან, რადგან მათივე თქმით, ადგილობრივ ხელისუფლებას არანაირი ნებართვა არ გაუცია.