ნანა მჭედლიძის შვილი: დედა ხშირად ამბობდა, რომ ყველაზე ბედნიერი ხონში იყო

კინორეჟისორი და მსახიობი ნანა მჭედლიძე დღეს ხონის მუნიციპალიტეტში დაკრძალეს.

ნანა მჭედლიძის შვილის, მაგდა მჭედლიძის თქმით, ნანა მჭედლიძე ანდერძს სისტემატურად ცვლიდა. ერთადერთი პუნქტი, რომელიც არ შეცვლილა, ხონში დაკრძალვა იყო.

,,დედამ ანდერძი დიდი ხნის წინ დაწერა, თუმცა სისტემატურად ცვლიდა და აკორექტირებდა. ერთადერთი, რაც არ შეცვლილა, მისი ხონში დაკრძალვა იყო. ის ყოველთვის ამბობდა, რომ მან საუკეთესო წლები ხონში გაატარა. 90 წლის ასაკში ხშირად ამბობდა, რომ ყველაზე ბედნიერი იყო მაშინ, როდესაც ხონში ცხოვრობდა,"-აცხადებს მაგდა მჭედლიძე.

შეგახსენებთ, რომ ნანა მჭედლიძე 29 მარტს 90 წლის ასაკში გარდაიცვალა.

მისი ფილმებია - "მოდის მატარებელი", "აეროპორტი", "გზაში"(1964), "ვიღაცას ავტობუსზე აგვიანდება"(1967), "დიდედები და შვილიშვილები"(1969), "პირველი მერცხალი"(1975), "ნამდვილი თბილისელი", "იმერული ესკიზები"(1979), "უკვდავების თეთრი ვარდი"(1985). არის ავტორი წიგნისა "მხიარული მოთხრობები".