იმერეთის გუბერნატორმა ბაღდათში საკონსულტაციო საბჭოს სხდომა გამართა

ბაღდათის მუნიციპალიტეტში იმერეთის გუბერნატორთან არსებული საკონსულტაციო საბჭოს სხდომა გაიმართა. აღნიშნულთან დაკავშირებით ინფორმაციას იმერეთის სამხარეო ადმინისტრაციის პრესსამსახური ავრცელებს.

შეხვედრას იმერეთის გუბერნატორი გივი ჭიჭინაძე, პირველი მოადგილე პაატა ნადირაძე, ვიცე-გუბერნატორები: გიორგი ჭიღვარია, იოსებ ხახალეიშვილი, მუნიციპალიტეტების გამგებლები, საკრებულოს თავმჯდომარეები და მოადგილეები ესწრებოდნენ.

საბჭოს სხდომაზე მუნიციპალიტეტებში 2016 წელს განსახორციელებელ პროექტებზე, ტენდერების მიმდინარეობასა და ამ კუთხით არსებულ მდგომარეობაზე იმსჯელეს.
შეხვედრაზე ევროპის რეგიონთა ასამბლეაში იმერეთის გაწევრიანების შესახებაც ისაუბრეს.

ასევე, აღნიშნულ სხდომაზე, 2016 წლის განმავლობაში ,,ეტალონი“-ს განხორციელებასთან დაკავშირებით პროექტის ხელმძღვანელმა გოჩა ტყეშელაშვილმა იმსჯელა.

სურსათის ეროვნული სააგენტოს იმერეთის სამმართველოს წარმომადგენელმა კი განსახორციელებელი პროექტების შესახებ ინფორმაცია საბჭოს წევრებს გააცნო.

შეხვედრაზე ინფორმაცია ქუთაისის ქალაქობის აღნიშვნასთან დაკავშირებითაც მოისმინეს.

იმერეთის გუბერნატორთან არსებული სამხარეო საკონსულტაციო საბჭო 3 თვეში ერთხელ იკრიბება.