ქუთაისის განვითარების საშუალოვადიანი სტრატეგია შვედეთის ქალაქ მალმოში განიხილეს

შვედეთის ქალაქ მალმოში, სკანეს რეგიონის ადმინისტრაციაში ქუთაისის განვითარების საშუალოვადიანი სტრატეგია-ქუთაისი 2020“-ის კონცეფციის პრეზენტაცია გაიმართა. პრეზენტაცია საერთაშორისო პროექტის -,,ადგილობრივი დემოკრატია და კომპლექსური ურბანული განვითარების დაგეგმარება “SymbioCity“-ის მიდგომით“ ფარგლებში შედგა. პროექტი, რომელსაც „ადგილობრივი დემოკრატიის შვედეთის საერთაშორისო ცენტრი“ (ICLD) ახორციელებს, 18 თვიანია და მასში საქართველოს, თურქეთის, მაკედონიის და სერბეთის 10 ქალაქის, ასევე ქუთაისის თვითმმართველობაა ჩართული. პროექტი მიზნად ისახავს მონაწილე თვითმმართველობებისათვის დახმარების გაწევას ურბანული განვითარების დაგეგმარების კუთხით.
პრეზენტაცია-განხილვაში მონაწილეობა მიიღო როგორც „ადგილობრივი დემოკრატიის შვედეთის საერთაშორისო ცენტრის“ (ICLD) ექსპერტებმა, ასევე პროექტის მონაწილე სხვა ქალაქების წარმომადგენლებმა.

ქუთაისის თვითმმართველობის სახელით პრეზენტაცია მერიის ეკონომიკური განვითარებისა და ადგილობრივი თვითმმართველობის ქონების მართვის სამსახურის უფროსმა პაატა კლდიაშვილმა წარმოადგინა.

როგორც ქუთაისის მერიის პრესსამსახურის მიერ გავრცელებულ განცხადებაშია ნათქვამი, პროექტის- ,,ადგილობრივი დემოკრატია და კომპლექსური ურბანული განვითარების დაგეგმარება ,,SymbioCity“-ის მიდგომით“ განხორციელებასთან დაკავშირებული ყველა ხარჯი სრულად იფარება „ადგილობრივი დემოკრატიის შვედეთის საერთაშორისო ცენტრის“ (ICLD) მიერ.