ბაგრატ ნანსყანი-იფხის წმინდა გიორგის ხატის მცველი

მესტიის რაიონ სოფელ ლატალში მე-11 საუკუნით დათარიღებული იფხის წმინდა გიორგის ხატი ინახება. ხატი ცნობილია იმით, რომ გადმოცემის თანახმად მასზე დალოცეს თამარ მეფე მეფედ კურთხევის ცერემონიალზე. ამ ხატზე საუბრობს ექვთიმე თაყაიშვილიც, სვანეთში მოგზაურობისას გააკეთებულ ჩანაწერებში.

აღნიშნული სიწმინდე ადგილობრივი მკვიდრის, ბაგრატ ნანსყანის ოჯახში ათეული წლებია საპატიო ადგილს იკავებს. მან ხატის გამო დიდი რეპრესიები გამოიარა, თუმცა სიამაყით აცხადებს, რომ მიუხედავად ყველაფრისა მაინც მოახერხა მისი დაცვა.

ბაგრატ ნანსყანს ყველა ,,ხატის მცველს“ უწოდებს. ამ დამსახურებისთვის მას საქართველოს კათოლიკოს პატრიარქმა მადლობის სიგელიც გადასცა მათ ოჯახში სტუმრობისას.
ბაგრატ ნანსყანი წლებია, სიწმინდეს იცავს და უფრთხილდება. მისივე თქმით, ხატის მცველი ღირსეული უნდა იყოს და იმსახურებდეს ამხელა პატივს, ამიტომაც ჯერ კიდევ ფიქრობს ვის გადასცეს ის, ისევ ნანსყანების საგვარეულოში.


ნანსყანების სტუმართმოყვარე ოჯახის კარი ყველასათვის ღიაა. მათ სტუმრობდნენ საინფორმაციო სააგენტო topnews.com.ge-ს წარმომადგენლებიც, რომლებმაც ორდღიანი ტრენინგი ჩაუტარეს სოფელ ლატალის საჯარო სკოლის მოსწავლეებს.


შეგახსენებთ, რომ საინფორმაციო სააგენტოს წარმომადგენლები სოფელ ლატალში ,,მაკლეინის ასოციაცია ბავშვებისთვის“ მიწვევით იმყოფებოდნენ.

თიკო ძოძუაშვილი