'ქუთაისი 2020'- ქუთაისის განვითარების კონცეფცია

ქუთაისის მუნიციპალიტეტის მერიის ეკონომიკური განვითარებისა და ადგილობრივი თვითმმართველობის ქონების მართვის სამსახურმა ქუთაისის განვითარების საშუალოვადიანი სტრატეგიის კონცეფციის განხილვა მოაწყო. განხილვაში მონაწილეობა ქალაქის მერმა შოთა მურღულიამ, საკრებულოს თავმჯდომარემ დავით დვალმა, იმერეთის ვიცე-გუბერნატორმა იოსებ ხახალეიშვილმა, ადგილობრივი თვითმმართველობის წარმომადგენლებმა, არასამთავრობო ორგანიზაციებმა და დარგის ექსპერტებმა მიიღეს.

როგორც განხილვაზე აღინიშნა, გასულ წელს სამსახურის მიერ არაერთი აქტივობა განხორციელდა. კერძოდ, გამოიკითხა ქუთაისში რეგისტრირებული 3279 ბიზნეს-სუბიექტი, განისაზღვრა საწარმოთა დარგობრივი სტრუქტურა და დასაქმებულთა რაოდენობა ეკონომიკის დარგების მიხედვით. განისაზღვრა ძირითადი საექსპორტო პროდუქცია, გამოვლინდა ყველაზე მოთხოვნადი პროფესიები, ქალაქის მასშტაბით მოეწყო „სამოქალაქო ფორუმი-შენი იდეა ქუთაისის განვითარებისათვის“ და სხვა. კონცეფციის შემუშავებაში ჩართული იყო მსოფლიო ბანკი „ქალაქების ეკონომიკური როლის კვლევა“, GGI (USAID contractor) დემოკრატიული მმართველობის ინიციატივა საქართველოში.

მერიის ეკონომიკური სამსახურის მიერ ჩატარებული კვლევების ანალიზის საფუძველზე განისაზღვრა ქალაქის სტრატეგიულად პრიორიტეტული მიმართულებები, რომელთა გათვალისწინებით საბოლოოდ შემუშავებული იქნება ქუთაისის განვითარების სტრატეგიული გეგმა „ქუთაისი - 2020“.

ქალაქის მერია და ეკონომიკური განვითარებისა და ადგილობრივი თვითმმართველობის ქონების მართვის სამსახური ყველა დაინტერესებულ დარგის სპეციალისტს თანამშრომლობისკენ მოუწოდებს.