სოციალურად დაუცველ პირებს ქუთაისში ექიმები უფასოდ მოემსახურებიან

ქუთაისის მერიასა და დ.ნაზარიშვილის სახელობის საოჯახო მედიცინის ცენტრს შორის მემორანდუმი გაფორმდა.

მემორანდუმი ქუთაისში შეჭირვებული მოქალაქეებისთვის უფასო სამედიცინო მომსახურების გაწევას ითვალისწინებს. აქცია ყოველი თვის პირველ შაბათს მოეწყობა, ხოლო მწოლიარე პაციენტებისთვის ბინაზე მისვლით ყოველი თვის მესამე შაბათს. ქუთაისის მერია ვალდებულებას იღებს ნაზარიშვილის სახელობის საოჯახო მედიცინის ცენტრს მიაწოდოს ინფორმაცია მოქალაქეთა ჯანმრთელობის მდგომარეობის შესახებ.

,,ასეთი ტიპის დახმარება სოციალურად შეჭირვებული მოსახლეობისთვის განსაკუთრებით მნიშვნელოვანია. ჩვენ არაერთხელ განვახორციელეთ სხვადასხვა კლინიკების ჩართულობით სამედიცინო აქციები, თუმცა ეს იყო ერთჯერადი. ახლა კი ნაზარიშვილის სახელობის საოჯახო მედიცინის ცენტრის დახმარებით რეგულარულად განხორციელდება,“-განაცხადა შოთა მურღულიამ.

დ.ნაზარიშვილის სახელობის საოჯახო მედიცინისა და საოჯახო მედიცინის სასწავლო ცენტრის დირექტორის მერაბ კვიცარიძის თქმით, შინმოვლის (ბინაზე ვიზიტის) პროგრამით ნაზარიშვილის კლინიკის ექიმები ბინაზე მწოლიარე ავადმყოფებს მოინახულებენ და შესაბამის სამედიცინო მომსახურებას გაუწევენ.

ქუთაისის მერის შოთა მურღულიას განცხადებით, აღნიშნული ინიციატივის გარდა, ნაზარიშვილის კლინიკასთან თანამშრომლობით სხვა პროექტებიც განხორციელდა. მისივე თქმით, პროექტები ქალაქს და არა პირად ინტერესებს ემსახურება.

ნათია სვანიძე