"პოლიტიკოსები პარლამენტში ორ კვირაში ერთხელ,'ხელის ასაწევად' ჩამოდიან"

სასწრაფოდ შეწყდეს კონსტიტუციის დარღვევა და ქუთაისს საპარლამენტო ქალაქის სტატუსი შეუნარჩუნდეს,- განცხადებას ამის შესახებ არასამთავრობო ორგანიზაცია "ევროპა ჩვენი სახლია" აკეთებს. ორგანიზაციის წარმომადგენლების თქმით, ხელისუფლებამ ქუთაისის ფუნქცია 4 წლის მანძილზე ვერ განსაზღვრა და პოლიტიკოსები პარლამენტში მხოლოდ ორ კვირაში ერთხელ, "ხელის ასაწევად" ჩამოდიან.

"კარგია, რომ არსებულ პრობლემას ხელისუფლებაც აღიარებს. ვგულისხმობ ნიშნიანიძის განცხადებას, რომ პარლამენტის გადატანა დედაქალაქში ქუთაისისთვის ცუდად დამთავრდება. სამწუხაროდ, ამ ყველაფრის გამოსასწორებლად დრო აღარ დარჩა,’’- აცხადებს ,,ევროპა ჩვენი სახლია’’-ს დამფუძნებელი თორნიკე ბარათაშვილი.

ორგანიზაციის წარმომადგენლები ყურადღებას პარლამენტის მიმდებარე ტერიტორიაზე არსებულ რთულ მდგომარეობაზეც ამახვილებენ. მათი თქმით, ტერიტორია საძოვრად და სანაგვედ არის ქცეული.

,,ევროპა ჩვენი სახლია’’ მოუწოდებს ცენტრალურ ხელისუფლებას თავი დაანებოს კონსტიტუციის დარღვევას და პარლამენტმა სრულად ქუთაისში იფუნქციონიროს, ხოლო ადგილობრივი ხელისუფლებისაგან პარლამენტის ტერიტორიაზე ზრუნვასა და ანტისანიტარული მდგომარეობის მოგვარებას მოითხოვს.

ქუთაისის მერიის წარმომადგენლები აღნიშნულ საკითხზე კომენტარს არ აკეთებენ, რადგან მათივე თქმით, პარლამენტის მიმდებარე ტერიტორია ადგილობრივი თვითმმართველობის საკუთრება არ არის.