17-დღიანი გაფიცვის შემდეგ მეშახტეებმა მუშაობა განაახლეს

ტყიბულში, მინდელისა და ძიძიგურის მაღაროში დასაქმებულმა 1000-ზე მეტმა მეშახტემ, 17- დღიანი პროტესტი შეწყვიტა და სამუშაოს დაუბრუნდა.

მეშახტეებს ადმინისტრაციამ 5-დან 10%-მდე ხელფასების და სამუშაო პირობების გაზრდა შესთავაზა. გაფიცულები აცხადებდნენ, რომ თავდაპირველად, ეს მოთხოვნები მათ აკმაყოფილებთ, თუმცა შემდეგ, ხელფასების ეტაპობრივი ზრდა უნდა განხორციელდეს.

"17 დღე გაფიცულები ვიყავით. ჩვენი მოთხოვნა ხელფასების 40%-ით გაზრდა იყო, თუმცა ამ ეტაზპე, ამ წინადადებაზეც თანახმა ვართ. შევალთ, დავაკვირდებით და თუ რაიმე ისეთს შევამჩნევთ, გაფიცვა ყოველთვის შეიძლება," -აცხადებს აქციის მონაწილე მეშახტე, ლევან ბეშკენაძე.

პროფკავშირების გაერთიანების თავმჯდომარე ირაკლი პეტრიშვილი კი ხელფასების გაზრდისა და სამუშაო პირობების გაუმჯობესების გარდა, საკანონმდებლო დონეზე ტყიბულში მცხოვრები მამაკაცებისთვის საპენსიო ზღვარის 65-წლიდან 55-მდე შემცირებას ითხოვს. აღნიშნულთან დაკავშირებით დეპუტატმა ელისო ჩაფიძემ განაცხადა, რომ ამის შესახებ საკანონმდებლო ორგანოში უკვე აქტიურად საუბრობს.