დევნილთა დასახლებაში მაცხოვრებელთა მოთხოვნას ქუთაისის მერიაში პასუხობენ

საზოგადოებრივი ტრანსპორტის დანიშვნასთან დაკავშირებით ქუთაისში, ჭონქაძის ქუჩაზე არსებული დევნილთა დასახლების მოსახლეობის მოთხოვნებს ქალაქის მერიაში პასუხობენ. ადგილობრივ ხელისუფლებაში აცხადებენ, რომ მათ მოსახლეობის წერილობითი მოთხოვნა უკვე განიხილეს.

"ქუთაისის მერიას წერილობით მიმართეს ჭონქაძის ქუჩის მცხოვრებლებმა. ჩვენ მათი განცხადება უპასუხოდ და რეაგირების გარეშე არ დაგვიტოვებია და ზედმეტად მიმაჩნია ასეთ თემებს პოლიტიკური პარტიები ქულებად იწერდნენ. ქალაქ ქუთაისში, ჭონქაძის ქუჩაზე ახალი სამარშრუტო ხაზის დანიშვნა მისი არარენტაბელობის გამო, მიზანშეუწონლად მიგვაჩნია. ხოლო არსებული სამარშრუტო სვლაგეზები (მაგ. №35 მარშრუტი) ვერ შეიცვლება, ვინაიდან ისინი კერძო გადამზიდავ კომპანიებზე არის გადაცემული 2019 წლამდე მოქმედი ნებართვებით. ამასთან განვმარტავთ, რომ ჩვენს მიერ განხილული იქნება საკითხი, არსებული M1 კატეგორიის ტრანსპორტით, ჭონქაძის ქუჩის მომსახურების შესახებ. კერძოდ: №101 მარშრუტის (წითელი ხიდი - ვაჟა-ფშაველას ქუჩა) სვლაგეზის მოდერნიზება-დაგრძელების თაობაზე ვაჟა-ფშაველას ქუჩიდან, ნიკოლაძის ქუჩის გავლით, ჭონქაძის ქუჩის ბოლომდე," - აცხადებს ქალაქის მერიის ტრანსპორტის განყოფილების უფროსი ირაკლი ცხვედიანი.

ჭონქაძის ქუჩაზე მაცხოვრებელთა პრობლემა "გირჩი"-ს ქუთაისის ოფისმა გააჟღერა. ორგანიზაციის განცხადებაზე მერიის საპასუხო განცხადებას კი "გირჩში" ტყუილს უწოდებენ.

"ადგილობრივი თვითმმართველობა ტყუის. არსებობს ხარჯთაღრიცხვა და შესაბამისი დასკვნა, რომ ხაზი რენტაბელურია. არსებულ დოკუმენტაციას დასკვნის ავტორები ხვალ გაასაჯაროვებენ,"- აცხადებს "გირჩი"-ს ქუთაისის ოფისის ხელმძღვანელი თემურ ცამციშვილი.