ვანში სოფლის მხარდაჭერის პროგრამის ფარგლებში მოსახლეობასთან შეხვედრები იწყება

ვანის მუნიციპალიტეტის გამგეობის სააქტო დარბაზში ინფრასტრუქტურის განვითარების სამინისტროს და იმერეთის გუბერნატორის ადმინისტრაციის წარმომადგენლებმა კობა ქიბაძემ და იუზა უგულავამ გამგეობის სამსახურის უფროსებთან და ადმინისტრაციულ ერთეულებში გამგებლის წარმომადგენლებთან შეხვედრა გამართეს.

შეხვედრას, რომელზეც სოფლის მხარდაჭრის პროგრამით განსახორციელებელი საკითხები განიხილეს, გამგებლის პირველი მოადგილე ლაშა გიორგაძე, გამგებლის თანაშემწე გენდერული თანასწორობის საკითხებში ნათია ძოძუაშვილი და გამგებლის წარმომადგენლებთან კოორდინაციის განყოფილების უფროსი ავთანდილ ხელაძე ესწრებოდნენ.

საუბარი შეეხო სოფლებში შეხვედრების დაგეგმვასა და პრიორიტეტების წარმოჩენას, ასევე გენდერული თანასწორობის საკითხებს, რადგან როგორც შეხვედრაზე აღინიშნა, მნიშვნელოვანია პრიორიტეტების განსაზღვრაში მამაკაცებმა და ქალბატონებმა თანაბარი მონაწილეობა მიიღონ.

როგორც გამგებლის მოადგილემ ლაშა გიორგაძემ აღნიშნა, მიმდინარე წელს უმჯობესი იქნება პრიორიტეტად სოფლებში საბავშვო ბაღების მოწესრიგების, მათი გათბობით აღჭურვისა და გათბობის, ასევე, სველი წერტილების მოწესრიგების მიჩნევა, რათა როგორც გიორგაძე ამბობს, მნიშვნელოვანია ყველა ბაღში დაცული იქნეს ბავშვის განვითარებისთვის აუცილებელი სანიტარულ-ჰიგიენური ნორმები.

"ამით ჩვენ ხელს შევუწყობთ მომავალი თაობის ნორმალურ სოციალურ ფუნქციონირებას და ადგილობრივ მოსახლეობას მივცემთ სტიმულს არ მიატოვოს სოფელი,"-ამბობს ლაშა გიორგაძე.

სოფლის მხარდაჭერის პროგრამის ფარგლებში, პრიორიტეტების დაგეგმვის მიზნით მოსახლეობასთან შეხვედრები პირველი მარტიდან დაიწყება.