საკადრო ცვლილება ქუთაისის მოსწავლე-ახალგაზრდობის სასახლეში

ქუთაისის მოსწავლე-ახალგაზრდობის სასახლეს ახალი დირექტორი ჰყავს. აღნიშნულ თანამდებობაზე მარინა მარჯანიშვილი დაინიშნა. მარჯანიშვილმა სასახლის ხელმძღვანელის თანამდებობაზე ია ვერულაშვილი ჩაანაცვლა. ვერულაშვილი წლების განმავლობაში მოსწავლე-ახალგაზრდობის სასახლის დირექტორის მოვალეობას ასრულებდა.

მარინა მარჯანიშვილი სპეციალობით ფილოლოგია. დაამთავრა ქუთაისის აკაკი წერეთლის სახელობის სახელმწიფო უნივერსიტეტის ისტორია-ფილოლოგიის ფაკულტეტი. იქვე მუშაობა დაიწყო პოლიტექნიკური ინსტიტუტის სამეცნიერო-კვლევით სექტორში უმცროს მეცნიერ-მუშაკად. წლების განმავლობაში ეწეოდა პედაგოგიურ მუშაობას საერო ინსტიტუტ „გელათში“, სადაც ლექციებს კითხულობდა ქართული ენა ლიტერატურის, სასამართლო ეთიკისა და ესთეტიკის საგნებში. 2005 წლიდან მარინა მარჯანიშვილი ხელმძღვანელობს ქუთაისის სასკოლო-თეატრალურ ფესტივალს „N-ოვაცია“-ს. 2009 წლიდან მან შექმნა სასკოლო-ახალგაზრდული დასი „მარჯანიშვილელები“, რომელსაც მოსწავლე-ახალგაზრდობის სასახლის დირექტორის თანამდებობაზე დანიშვნამდე ხელმძღვანელობდა. ამასთანავე,7 წლის მანძილზე მოვაწეობდა ქუთაისის სახელმწიფო ანსამბლში მსახიობ-მოცეკვავის სტატუსით. არის „IFSAID”-ის (სტუდენტური და მოსწავლე სამოყვარულო თეატრები) საერთშორისო ფესტივალის წარმომადგენელი დასავლეთ საქართველოში.

„პირველ რიგში, მინდა დიდი მადლობა გადავუხადო ქალაქის ხელმძღვანელობას ჩემს მიმართ გამოცხადებული ნდობისთვის. ქუთაისის მოსწავლე-ახალგაზრდობის სასახლის დირექტორობა ჩემთვის უზარმაზარი პასუხისმგებლობაა. მაქვს ძალიან დიდი გეგმები და ყველაფერს გავაკეთებ იმისთვის, რომ მოსწავლე-ახალგაზრდობის სასახლე შეესაბამებოდეს თავის ნადვილ სტატუსს,“ - აცხადებს მარინა მარჯანიშვილი.

ცნობისათვის, ქუთაისის მოსწავლე-ახალგაზრდობის სასახლე ა(ა)იპ „ქ.ქუთაისის კულტურულ, სახელოვნებო, საგანმანათლებლო დაწესებულებათა გაერთიანების“ ფილიალს წარმოადგენს. სასახლეში სწავლა 32 მიმართულებაზე უფასოდ ხორციელდება.