"პორტს რა უნდა ქუთაისში?!"- კახა კალაძე ომარ ნიშნიანიძის იდეით გაკვირვებულია

ვიცე-პრემიერის და ენერგეტიკის მინისტრის კახა კალაძის თქმით, მისთვის გაურკვეველია საპარლამენტო უმრავლესობის წევრის ომარ ნიშნიანიძის ინიციატივა ქუთაისის საპორტო ქალაქთან დაკავშირებით.

ვიცე-პრემიერის თქმით, პორტი ქუთაისში ვერ მოეწყობა.

"პორტს რა უნდა ქუთაისში, არის პორტი ქუთაისში?! -არ ვიცი",- განაცხადა კახა კალაძემ.

შეგახსენებთ, რომ ქუთაისის პორტისა და მიწისქვეშეთის განვითარება "ქართული ოცნების" ერთ-ერთი დეპუტატის ომარ ნიშნიანიძის იდეაა. ომარ ნიშნიანიძის შეფასებით, ქუთაისის პორტს გარკვეული ტურისტული მნიშვნელობა შეიძლება ჰქონდეს, თუმცა ის ტვირთბრუნვით ანაკლიის პორტს ვერ გადააჭარბებს.

"რა თქმა უნდა, ანაკლიის ღრმაწყლოვან პორტს კონკურენციას ვერ გავუწევთ, მაგრამ რიონის სამდინარო ფუნქციის აღდგენა საინტერესოდ მეჩვენება. დიდ გემებს ვერ მივიღებთ, მაგრამ თუნდაც ტურიზმის განვითარების თვალსაზრისით შესაძლებელია, რომ ვარციხე-გეგუთის მიდამოებამდე გაკეთდეს, რაც ფაქტიურად ქუთაისია. დიდი ისტორიკოსი ნიკო ბერძენიშვილი ამბობდა, რომ გეგუთი ქვემო ქუთაისია, სწორედ იქ იყო ძველი, აიეტის ქუთაისი", - განაცხადა საპარლამენტო უმრავლესობის წევრმა ომარ ნიშნიანიძემ.