"ყველაზე არაკომპეტენტური და სამარცხვინო კვლევა," -ქუთაისის მერია 'გამჭვირვალობას' კვლევას უწუნებს

,,ყველაზე არაკომპეტენტური და ყველაზე სამარცხვინო,’’ - ასე აფასებს ქუთაისის მერიის ადმინისტრაციული სამსახურის უფროსი ზვიად ჯავახია ,,საერთაშორისო გამჭვირვალობა -საქართველო"-ს მიერ, ქუთაისის მერიის საქმიანობასთან დაკავშირებით ჩატარებულ კვლევას.

ზვიად ჯავახიას განცხადებით, მოქალაქეების მიერ მერიაში გაგზავნილი ყველა შეტყობინება, რომელთა რაოდენობაც 17- ის ნაცვლად 300-ს შეადგენს, დაკმაყოფილებულია. ხოლო საიტი www.chemikucha.ge, რომელზეც "საერთაშორისო გამჭვირვალობა საქართველო"-ს წარმომადგენლების თქმით, მოქალაქეები კონკრეტულ ქუჩაზე არსებულ შეტყობინებებს აგზავნიან, არ მუშაობს. საიტით სარგებლობა მხოლოდ მობილური აპლიკაციითაა შესაძლებელი, ისიც შეფერხებით.

ზვიად ჯავახიას განცხადებით, მათი მუშაობა გამჭვირვალეა.

"ორგანიზაციის წარმომადგენელს ზურაბ ზამბახიძეს უნდა სცოდნოდა, რომ 2013 წლის თებერვალში მიღებული იქნა მთავრობის განკარგულება, რომლის მიხედვითაც პროექტი რეგიონალური განვითარების ფონდიდან ვერ მიიღებს დაფინანსებას, თუ იქ სათანადო დოკუმენტაცია და ხარჯთაღრიცხვა არ იქნა წარმოდგენილი. ჩვენ ვაპირებთ წერილი მივწეროთ "საერთაშორისო გამჭვირვალობა -საქართველო"-ს ცენტრალურ ოფისს, რომელშიც დეტალურად აღვწერთ იმ არაკომპეტენტურობას, რომლითაც ჩატარდა აღნიშნული კვლევა,"- აცხადებს ჯავახია.

ადმინისტრაციული სამსახურის უფროსის განცხადებით, ისინი აღნიშნულ ფაქტზე სასამართლო დავას არ აპირებენ.

ნათია სვანიძე