"ქუთაისის მერია მოქალაქეთა მიმართვაზე რეაგირებას არ ახდენს"

ქუთაისი ერთადერთი ქალაქია, რომელსაც მოქალაქეთა მიმართვიანობაზე მუნიციპალური ორგანოების მხრიდან რეაგირების ნულოვანი მაჩვენებელი აქვს,- კვლევის შედეგებს ,,საერთაშორისო გამჭვირვალობა - საქართველო" აქვეყნებს.

ორგანიზაციის წარმომადგენლების განცხადებით, ვებ-გვერდზე www.chemikucha.ge მოქალაქეთა 17-ვე შეტყობინება, რომელიც ჯერ კიდევ 2014 წელს იყო გაგზავნილი, ამ დრომდე რეაგირების გარეშეა.

ორგანიზაციის მიერ ჩატარებული კვლევის შედეგად, გაურკვეველი დარჩა თუ რა პრინციპით განსაზღვრავს ქუთაისის მერია მომდევნო წლისათვის დადეგმილი სამუშაოების პრიორიტეტულობას. როგორც "საერთაშორისო გამჭვირვალობა - საქართველო"-ს წარმომადგენლები აღნიშნავენ, მათ ვერ მიიღეს განმარტება თუ რის საფუძველზე დაიანგარიშეს თანხები საქალაქო სამსახურებმა, რომლებიც წლის განმავლობაში ჩასატარებელი სამუშაოებისათვის იყო მოთხოვნილი.

ორგანიზაციის წარმომადგენლები მოითხოვენ განმარტებას იმასთან დაკავშირებით,რატომ ხარჯავს მერია ადგილობრივი ფინანსური სახსრებიდან თანხებს წყლისა და საკანალიზაციო სისტემების მოწყობაზე. მათივე თქმით, აღნიშნული პრობლემის მოგვარება საქართველოს გაერთიანებული წყალმომარაგების კომპანიის მოვალეობაა.

"საერთაშორისო გამჭვირვალობა-საქართველო"-ს ქუთაისის ოფისის კოორდინატორი ზურაბ ზამბახიძე მოუწოდებს ქუთაისის ადგილობრივ თვითმმართველობას, რომ მათი მუშაობის პროცესი რაც შეიძლება გამჭვირვალე იყოს, დროულად უპასუხონ მოქალაქეების მიმართვას და მიაწოდონ საჭირო ინფორმაცია.

ნათია სვანიძე