"ქუთაისის არქეოლოგია", - წიგნი ქალაქის ისტორიაზე

,,ჩვენ გვაქვს უტყუარი მასალა ქუთაისის ქალაქობის, როდის წარმოიშვა ის და რამდენი წლის ისტორია აქვს,’’- განაცხადა ომარ ლანჩავამ საკუთარი წიგნის - "ქუთაისის არქეოლოგია"-ს პრეზენტაციაზე. ღონისძიება ქუთაისის სახელმწიფო ისტორიულ მუზეუმში გაიმართა. აღნიშნულ წიგნში ერთიან დოკუმენტად პირველად გამოქვეყნდა არქეოლოგიური კვლევის შედეგები.

ომარ ლანჩავას წიგნის გამოცემა კულტურული მემკვიდრეობის ეროვნულმა სააგენტომ დააფინანსა. წიგნი ქუთაისის უძველეს ისტორიას ეხება და იმ მასალების საფუძველზეა დაწერილი, რომელიც ათეული წლის განმავლობაში არქეოლოგიური გათხრების შედეგად აღმოჩნდა.

პრეზენტაციას ქუთაისის მერი შოთა მურღულია ესწრებოდა, რომელმაც მოწვეულ სტუმრებსა და მთელ საქართველოს დავითობა მიულოცა. მურღულიას თქმით, წარმოდგენილი წიგნი ამტკიცებს, რამდენად ძველი ქალაქია ქუთაისი.

"ვიწყებთ ფიქრს იმაზე, რომ ჩვენი ქალაქი, როგორც უძველესი თავისი ღირშესანიშნაობებით, იყოს მსოფლიო მემკვიდრეობის ნუსხაში. ამ ყველაფერს სერიოზული მუშაობა სჭირდება. პირველი ეტაპი იყო წიგნის გამოცემა, ხოლო შემდგომი იქნება გარკვეული ღონისძიებების დაგეგმვა,"- განაცხადა კულტურული მემკვიდრეობის დაცვის ეროვნული სააგენტოს დირექტორმა ნიკოლოზ ანთიძემ.

ნათია სვანიძე