ხარაგაულის მუნიციპალიტეტის 6 სოფელს მაღალმთიანი დასახლების სტატუსი მიენიჭა

ხარაგაულის მუნიციპალიტეტიდან მაღალმთიან დასახლებათა ნუსხაში შევიდა:გოლისი, გოლათუბანი, გუდათუბანი, ფონა, ნუნისი, პატარა სახვლარი.

,,მაღალმთიანი რეგიონების განვითარების შესახებ“ მიღებული კანონი საქართველოს კონსტიტუციით გარანტირებული მაღალმთიანი რეგიონების სოციალურ-ეკონომიკური პროგრესის სტიმულირებას ითვალისწინებს, რაც თავის მხრივ დამატებით სოციალურ და საგადასახადო შეღავათებს გულისხმობს.

2016 წლის პირველი იანვრიდან ამოქმედდა:
ყოველ დაბადებულ პირველ და მეორე ბავშვზე 1 წლის განმავლობაში ყოველთვიურად გაიცემა 100 ლარი, მესამე და შემდგომ ბავშვებზე 2 წლის განმავლობაში -200 ლარი.სკოლებსა და პროფესიულ საგანმანათლებლო დაწესებულებებს ეზრდებათ ვაუჩერი.

ამოქმედდა საგადასახადო შეღავათები, რომლებიც ითვალისწინებს შემდეგს:
მაღალმთიან დასახლებაში მუდმივად მცხოვრები პირები, რომელთა შემოსავალი არ აღემატება 6 ათას ლარს, საშემოსავლო გადასახადისაგან თავისუფლდებიან. მეწარმე ფიზიკური პირები და საწარმოები თავისუფლდებიან საშემოსავლო, ქონებისა და მოგების გადასახადისაგან 10 წლის ვადით.

2016 წლის 1 სექტემბრიდან ამოქმედდება შემდეგი შეღავათები:
მასწავლებლებს დაუწესდებათ სახელფასო დანამატი არანაკლებ 35%-ის ოდენობით;სპეციალური რეგიონალური პროგრამების მონაწილე მასწავლებლებს დაუწესდებათ დამატებითი ანაზღაურება ხელფასის არანაკლებ 50%-ის ოდენობით. სახელმწიფო პენსიისა და სოციალური პაკეტის მიმღებ პირებს დაუწესდებათ 20%-იანი დანამატი.დაწესდა ყოველთვიური დანამატი ექიმებისათვის- სახელმწიფო პენსიის ორმაგი ოდენობით, ხოლო ექთნებისათვის- სახელმწიფო პენსიის ოდენობით. მოსახლეობა ზამთრის პერიოდში უზრუნველყოფილი იქნება გათბობით.

2017 წელს ძალაში შევა შემდეგი ინიციატივა: ანაზღაურდება ელექტროენერგიის ხარჯების 50%; მიწის ნაკვეთი თავისუფლდება ქონების გადასახადისაგან. ფიზიკური პირისათვის მაღალმთიან დასახლებაში მუდმივად მცხოვრები პირის სტატუსის მინიჭების, შეწყვეტის, შეჩერების და აღდგენის საკითხზე გადაწყვეტილებას შესაბამისი მუნიციპალიტეტის გამგებელი იღებს.