ქუთაისში გარდაცვლილი ჟურნალისტი გაიხსენეს

ნინოობის დღესასწაულთან დაკავშირებით, ა(ა)იპ ქუთაისის “კულტურულ, სახელოვნებო,საგანმანათლებლო დაწესებულებათა გაერთიანების” ინიციატივით, ქუთაისელი ჟურნალისტი ნინო ღაჭავა გაიხსენეს. ნინო ღაჭავას დედას თამარ ღაჭავას, რომელიც გაერთიანების დაქვემდებარებაში არსებულ ცენტრალურ სამუსიკო სასწავლებელში მუშაობს, ქალაქის მერმა შოთა მურღულიამ მერიაში უმასპინძლა, ნინოობა მიულოცა და საჩუქარი გადასცა.

ნინო ღაჭავა 2010 წელს, 41 წლის ასაკში, ხანგრძლივი და მძიმე ავადმყოფობის შემდეგ გარდაიცვალა. მან მუშაობა ადგილობრივ ტელეკომპანია "რიონში" დაიწყო. სხვადასხვა დროს იყო ტელეკომპანია "ივერიონის" და "იბერვიზიის" ქუთაისის ფილიალის კორესპონდენტი. წერდა რამდენიმე პერიოდულ გამოცემაში. 1999 წლის დეკემბრიდან იყო რადიო თავისუფლების ქუთაისის კორესპონდენტი და რეგულარულად მონაწილეობდა რადიო “თავისუფლების” ყოველკვირეული პროგრამის „რეგიონული მაცნის“ მომზადებაში.2007 წლიდან იმერეთის რეგიონში პირველი არხის საინფორმაციო პროგრამის კორესპონდენტად მუშაობდა.