ქუთაისში, გუმათჰესის ტერიტორიაზე მეწყერი ჩამოწვა

ქუთაისი-ამბროლაურის დამაკავშირებელი გზა მეწყერმა წაიღო. მეწყერი ქუთაისთან ახლოს, გუმათჰესის ტერიტორიაზე ჩამოწვა. ამ დროისათვის შემთხვევის ადგილი, სადაც სპეციალისტები მუშაობენ, სპეციალური ჯებირებით არის გადაკეტილი. ადგილზე იმყოფებიან იმერეთის სამხარეო ადმინისტრაციისა და წყალტუბოს მუნიციპალიტეტის გამგეობის წარმომადგენლები.

"ეს არის ქუთაისი-ალპანა-მამისონის საავტომობილო გზის მონაკვეთი. შემთხვევა რამდენიმე საათის წინ მოხდა. ჩვენ მაშინვე ჩავატენეთ საქმის კურსში საავტომობილო გზების დეპარტამენტი და რეგიონული განვითარების სააგენტო. გზის მონაკვეთის აღდგენითი სამუშაოები ამინდის გაუმჯობესებისთანავე დაიწყება, მანამ კი არსებობს შემოვლითი გზა და მძღოლებს გადაადგილებაზე პრობლემა არ შეექმნებათ," - აცხადებს წყალტუბოს გამგებლის მოადგილე ზაზა ძნელაძე.