ქუთაისში მდინარე რიონის ფერდების გაწმენდითი სამუშაოები მიმდინარეობს

ქუთაისში, წითელი ხიდისა და რუსთაველის ხიდის მიმდებარე ტერიტორიაზე, მდინარე რიონის ფერდების გაწმენდითი სამუშაოები მიმდინარეობს. აღნიშნულ სამუშაოებს ა(ა)იპ "სპეციალური სერვისები" ახორციელებს.

ადგილობრივების თქმით, მდინარის ფერდები მოსახლეობის დაუდევრობის გამო, ნაგავსაყრელად იყო ქცეული.

"სპეციალურ სერვისებში" აცხადებენ, რომ საზოგადოების თავშეყრის ადგილებში მსგავსი ტიპის დასუფთავებით სამუშაოებს მომავალშიც განახორციელებენ.

"ჩვენი სამსახური სისტემატიურად ასუფთავებს საზოგადოებრივი თავშეყრის ადგილებს. დღეს გაწმენდითი სამუშაოები მიმდინარეობს წითელი ხიდისა და რუსთაველის ხიდის მიმდებარე ტერიტორიებზე. სამუშაოების ფარგლებში, პოლიეთილენის პარკების გარდა, ტერიტორია ეკალ-ბარდებისაგანაც გავასუფთავეთ,"- აცხადებს "სპეციალური სერვისები"-ს დირექტორის მოადგილე არჩილ ჭავჭანიძე.