ქუთაისის მერიის ააიპ-ებში ვაკანტურ ადგილებზე კონკურსი გამოცხადდა

ქუთაისის მერიის დაქვემდებარებაში არსებულ ააიპ-ებში ვაკანსიები გამოცხადდა. ვაკანსიები ა(ა)იპ ,,ქალაქ ქუთაისის კულტურულ, სახელოვნებო, საგანმანათლებლო დაწესებულებათა გაერთიანებასა" და ა(ა)იპ ,,ქალაქ ქუთაისის სპორტულ დაწესებულებათა გაერთიანება"-ს ეხება.

კულტურულ დაწესებულებათა გაერთიანებაში კონკურსის წესით სპეციალისტებს, უფროს სპეციალისტებს, იურისტს, ბუღალტერსა და მმართველის მოადგილეს შეარჩევენ (სულ 8 ვაკანსია).

რაც შეეხება სპორტულ დაწესებულებათა გაერთიანებას, დაწესებულებაში ვაკანტურად საინფორმაციო ტექნოლოგიების სპეციალისტის, საზოგადოებასთან ურთიერთობის სამსახურის სპეციალისტის, საქმის მწარმოებლის, ლოჯისტიკის მენეჯერის, შესყიდვების სპეციალისტის, საქალაქო ღონისძიებების მართვის განყოფილების სპეციალისტის, ამავე განყოფილების უფროსის, მონიტორინგის ჯგუფის სპეციალისტის, მონიტორინგის ჯგუფის უფროსის, გაერთიანების ბუღალტერის, ადმინისტრაციის უფროსისა და მმართველის მოადგილის პოზიციებს ეხება.

კონკურსი განაცხადების გადარჩევის, ტესტირებისა და გასაუბრების ეტაპებს მოიცავს. კონკურსში მონაწილეებს განაცხადების გაკეთება მიმდინარე წლის 12 იანვრიდან 22 იანვრის ჩათვლით შეეძლებათ.