ვანის მაღალმთიან სოფლებში გზის გასაწმენდად ტექნიკა ვერ ადის

დიდთოვლობის მიზეზით, ვანის მუნიციპალიტეტის მაღალმთიანი სოფლები-სულორი და ძულუხი გარესამყაროს არის მოწყვეტილი. საინფორმაციო სააგენტო Topnews.com.ge-ს ადგილობრივები დაუკავშირდნენ. მათი განცხადებით, სულორს და ძულუხს ელექტროენერგია 2 დღეა არ მიეწოდება. ხოლო უშუქობას უგზოობაც დაემატა.

"სოფლები ფაქტიურად პარალიზებულია. ადგილზე ერთ მეტრამდე თოვლია. მუნიციპალიტეტიდან მოსახლეობასთან დასახმარებლად არავინ მოსულა. გთხოვთ, მიაწვდინოთ ხელისუფლებას ჩვენი ხმა," - აცხადებენ ადგილობრივები.

ვანის მუნიციპალიტეტის გამგებლის ზაზა ხურციძის თქმით, სოფელ ძულუხსა და სულორში გზის გასაწმენდად გაშვებული ტრაქტორი უკან დაბრუნდა, რადგან სოფლებამდე ვერ ავიდა. რაც შეეხება ელექტროენერგიას, როგორც ხურციძე ამბობს, სოფლების მოსახლეობის ნაწილს შუქი მიეწოდება, ხოლო დარჩენილი ნაწილისთვის შუქის მისაწოდებლად სამუშაოები მიმდინარეობს, რის შედეგადაც ენერგომომარაგება დღის ბოლომდე უნდა აღდგეს.