„გირჩი“ ქუთაისის მერიას 12 რეაბილიტირებული სტადიონის მისამართის დამალვაში ადანაშაულებს

"ახალი პოლიტიკური ცენტრი-გირჩი"-ს ქუთაისის ორგანიზაციის თავმჯდომარე თემურ ცამციშვილი ქუთაისის მერიას საჯარო ინფორმაციის დამალვაში ადანაშაულებს.

ცამციშვილის თქმით, მათ 2 კვირის წინ ქუთაისის მერიას საჯარო ინფორმაციის მიწოდების თხოვნით მიმართეს. "გირჩი" რეაბილიტირებული მოედნების ადგილმდებარეობას ითხოვდა, თუმცა ორგანიზაციაში აცხადებენ, რომ წერილზე პასუხი ამ დრომდე არ მიუღიათ.

"მოგმართავთ ღიად. ჩვენ მხოლოდ ვითხოვთ იმ ინფორმაციის მოწოდებას რომელიც საჯაროა და ყველასათვის ხელმოსაწვდომი,"- აცხადებს თემურ ცამციშვილი.

"გირჩი"-ს განცხადებას ქუთაისის მერიის ადმინისტრაციულ სამსახურში პასუხობენ. სამსახურის უფროსი ზვიად ჯავახია განმარტავს, რომ ქუთაისელმა "გირჩებმა" მორიგი სიცრუე გაავრცელეს.

„სტადიონების ადგილმდებარეობასთან დაკავშირებით, ჩვენთვის არცერთ პოლიკტიკურ ორგანიზაციას არ მოუმართავს. ზოგადად, „გირჩები“ რა ინფორმაციასაც ითხოვდნენ, ყველაფერზე პასუხი გაცემულია. სტადიონების ადგილდებარეობაზე „გირჩების“ ნაცვლად, ერთ-ერთმა მოქალაქემ გამოითხოვა ინფორმაცია, რომელზეც პასუხი მან დადგენილ ვადებში მიიღო“, - აცხადებს ზვიად ჯავახია.