ჰიტლერის წინააღმდეგ მოწყობილი შეთქმულების მარცხი-საჯარო ლექცია ქუთაისში

თარიღი : 22-12-2015, 18:59 | კატეგორია: ახალი ამბები, პოლიტიკა

ქუთაისის "დემოკრატიული ჩართულობის ცენტრში" "პროგრესული თაობისა" და ქართულ-უკრაინული უნივერსიტეტის ორგანიზებით თემაზე - "ოპერაცია ვალკირია" საჯარო ლექცია გაიმართა.

"1944 წლის 20 ივლისს მომზადდა შეთქმულება ჰიტლერის წინააღმდეგ. ოპერაცია "ვალკირიის" მონაწილე ადამიანები იყვნენ გმირები, რომლებიც აღუდგნენ ნაცისტურ რეჟიმს და უნდოდათ შეეცვალათ უკეთესობისკენ არა მარტო გერმანია, არამედ მთელი მსოფლიო. თუმცა ეს წარუმატებელი მცდელობა გამოდგა. ისინი დამარცხდნენ და რომ არა ასეთი დასასრული, ომი ერთი წლით ადრე დასრულდებოდა. ნაცისტური რეჟიმიც ერთი წლით ადრე შეწყვეტდა არსებობას და სხვა მმართველობა ეყოლებოდა გერმანიას," - ამბობს ისტორიკოსი ანნა გედენიძე.

საჯარო ლექციას მოწვეული ისტორიკოსი ლევან სვანაძე, სტუდენტები და პოლიტიკოსები დაესწრნენ.

"მინდა ვთქვა, რომ მსგავსი ტიპის ლექცია ჯერ არ ჩატარებულა საქართველოში. ეს ლექცია გამიზნულია სტუდენტებისთვის, რომ კიდევ ერთხელ შევახსენოთ მათ რა მოხდა ამ პერიოდში და როგორი გმირობა გამოიჩინეს ოპერაცია "ვალკირიის" მონაწილეებმა,"-ამბობს "პროგრესული თაობის" ხელმძღვანელი ასმათ დვალიშვილი.

თამუნა სხულუხია

ნანახია: 2499-ჯერ