თერჯოლაში ადიდებულმა მდინარემ ავტომაგისტრალის ნაწილი ისევ წაიღო

ძლიერი წვიმის შედეგად, თერჯოლის რაიონში მდინარე ჩხარა ადიდდა, რომელმაც ავტომაგისტრალის მონაკვეთი წაიღო.
შემთხვევის ადგილზე მუნიციპალიტეტის გამგებელი თემურ ჯაფარიძე იმყოფება.
მისი თქმით, ავტომაგისტრალის აღდგენითი სამუშაოები ამინდის გაუმჯობესებისთანავე დაიწყება.
"გზის ქვემოთ სამი მილი იყო, რომელიც წყალს ატარებდა, თუმცა უხვი ნალექი მილებმა ვერ გაატარეს. ამ დროისათვის აღმოსავლეთ საქართველოდან დასავლეთ საქართველოში მოხვედრა ზესტაფონი-ბაღდათი-ქუთაისის გზის მონაკვეთით არის შესაძლებელი," - განაცხადა გამგებელმა.
შეგახსენებთ, რომ ძლიერი წვიმების გამო აღნიშნული ავტომაგისტრალი რამდენიმე კვირის წინაც დაზიანდა.