ქუთაისის საერთაშორისო აეროპორტში, ხარკოვის მიმართულებით ფრენები განახლდება

ქუთაისის დავით აღმაშენებლის სახელობის საერთაშორისო აეროპორტიდან, ხვალ, ავიაკომპანია უკრაინის საერთაშორისო ავიახაზები, ხარკოვი-ქუთაისი-ხარკოვის მიმართულებით პირველ ავიარეისს შეასრულებს.

ეკონომიკის სამინისტროს ინფორმაციით, მოლაპარაკებების პროცესი საქართველოს ეკონომიკისა და მდგრადი განვითარების სამინისტროს შპს საქართველოს აეროპორტების გაერთიანებასა და უკრაინის საერთაშორისო ავიახაზების წარმომადგენლებს შორის წარმატებით დასრულდა. 19 დეკემბრიდან მგზავრებს ქუთაისი-ხარკოვის ავიარეისით სარგებლობა კვირაში ორჯერ - ოთხშაბათსა და შაბათს შეეძლებათ.

ავიაბილეთის ერთი გზის საფასური 60 აშშ დოლარი, ხოლო ორი გზის - 130 აშშ დოლარიდან იწყება. ბილეთების შეძენა მსურველებს უკრაინის საერთაშორისო ავიახაზების ვებ-გვერდზე (www.flyuia.com) შეეძლებათ.

ცნობისთვის, ხარკოვის მიმართულებით 2013- 2014 წლებში ავიარეისებს ავიაკომპანია "ვიზეარ უკრაინა" ახორციელებდა და ამ პერიოდში აღნიშნულ მარშრუტზე 34 813 მგზავრი იქნა გადაყვანილი. რეისები ავიაკომპანია ვიზეარ უკრაინამ ქვეყანაში განვითარებული მოვლენების გამო გააუქმა.