ზუგდიდში დადიანების სასახლეს რეაბილიტაცია უტარდება

საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ანთიძემ ზუგდიდში მდებარე დადიანების სასახლე მოინახულა და 2015 წლის სახელმწიფო პროგრამის ფარგლებში განხორციელებული სარესტავრაციო-სარეაბილიტაციო სამუშაოები შეაჯამა.

2015 წლის სახელმწიფო პროგრამის ფარგლებში განხორციელებული დადიანების სასახლის ბოტანიკური ბაღის არქეოლოგიური სამუშაოების შედეგად გამოვლინდა სასახლის ნანგრევები, რომელიც ზომებით და ნახაზით ისტორიულ წყაროებში მოხსენიებულ “ჯვარედინი სასახლის” იდენტურია. ამჟამად მიმდინარეობს გაწმენდითი სამუშაოები. 2016 წლის სახელმწიფო პროგრამის ფარგლებში კი გაგრძძელდება არქეოლოგიური სამუშაოები.

ნიკო დადიანისეული სასახლე, რომელიც XIX საუკუნის 80-იან წლებში არქიტექტორ ლ. ვასილევის მიერ შედგენილი პროექტით განხორციელდა, უშუალოდ ესაზღვრება ბოტანიკურ ბაღს. სასახლე საკმაოდ მასშტაბურ ნაგებობას წარმოადგენს, რომლის ფასადების სიმეტრიული დანაწევრება თავისებურ კომპოზიციას ქმნის. საქართველოს კულტურული მემკვიდრეობის დაცვის ეროვნული სააგენტოს 2015 წლის სახელმწიფო პროგრამის ფარგლებში, დადიანების სასახლეთა კომპლექსში ნიკო დადიანის სასახლის სარესტავრაციო-სარეაბილიტაციო სამუშაოები დაიწყო. შენობას განსაკუთრებულ პრობლემას უქმნიდა როგორც სახურავიდან ჩამონადენი, ასევე მიმდებარე ტერიტორიაზე დაგროვილი წვიმის წყალი, რომელიც პირდაპირ ჩაედინებოდა სარდაფში და აზიანებდა საძირკველს. დღეისათვის დამთავრებულია ძირითადი გაწმენდითი სამუშაოები, ფასადზე მოხსნილია ცემენტის ნალესობა; დამონტაჟდა პირველი სართულის ხის იატაკი; სარდაფები ამოსუფთავებულია მიწისა და სამშენებლო ნარჩენებისაგან; შენობის გარშემო მოიხსნა მიწა და მოეწყო საძირკვლის სავენტილაციო-სანიაღვრე არხი; გასუფთავებულ სარდაფებში აღდგა კედლები და ისტორიული სავენტილაციო არხები; ახალი იატაკების მოსაწყობად გაკეთდა აგურის ტუმბოები.