ქუთაისელი მეეზოვე: 5 შვილის დედა ვარ და 5 წელია ჩემი ქალაქის სისუფთავეზე ვზრუნავ

იმერეთის მთავარი საინფორმაციო სააგენტო Topnews.com.ge ააიპ “სპეციალური სერვისები“-ს საზოგადოებასთან ურთიერთობის სამსახურთან ერთად წარმოგიდგენთ ახალ რუბრიკას სახელწოდებით: "პროფესია ახლო ხედით".
რუბრიკის ფარგლებში ააიპ „სპეციალურ სერვისებ“-ში დასაქმებული იმ ადამიანების შესახებ მოგითხრობთ, რომლებიც ქუთაისის სისუფთავეზე ყოველდღიურად ზრუნავენ. ერთ-ერთ მათგანს შორენა მარაქველიძე წარმოადგენს.
39 წლის ქალბატონი ხუთი შვილის დედაა, და ამასთანავე 5 წელია ქუთაისის სისუფთავეზე ზრუნავს.
ქალბატონი ჩვენთან საუბარში ამბობს, რომ პროფესია, რომელსაც ის ემსახურება, მისთვის საამაყოა და ამასთანავე შემოსავლის ერთადერთი წყაროც.
"დილით ადრე გათენებამდე ვდგები, ბავშვებისთვის ყველაფერს ვამზადებ, რომ დილით, როცა ადგებიან და სკოლაში წავლენ ყველაფერი წესრიგში დახვდეთ. ამის შემდეგ მივდივარ სამსახურში და ჩემს ქალაქს ვასუფთავებ. მეამაყება, რომ მე ვარ ადამიანი, რომელიც ქუთაისის სისუფთავეზე ზრუნავს. 5 წელია მეეზოვედ ვმუშაობ და არასოდეს არ მრცხვენოდა ამის. ჩემი ოჯახის მთავარი შემოსავალიც სწორედ მეეზოვეობიდან აღებული ხელფასია,"-ამბობს შორენა მარაქველიძე.