კულტურულ დაწესებულებათა გაერთიანების საჩუქრები შშმ ბავშვებს

შეზღუდული შესაძლებლობის მქონე პირთა დღესთან დაკავშირებით, ააიპ ქუთაისის კულტურულ, სახელოვნებო, საგანმანათლებლო დაწესებულებათა გაერთიანების წარმომადგენლები შეზღუდული შესაძლებლობის მქონე ბავშვთა დღის ცენტრს-„ჯადოსნურ სამყაროს“ ესტუმრნენ.გაერთიანების მმართველმა ელისო ქაროსანიძემ დღის ცენტრის ბენეფიციარებს საჩუქრად ტკბილეული და წიგნები გადასცა, ხოლო გაერთიანებაში შემავალი აკაკი ვასაძის სახელობის ფოლკლორის სახელოვნებო სასწავლებლისა და გიორგი დარახველიძის სახელობის ხელოვნების სკოლის ანსამბლებმა დღის ცენტრში მუსიკალური ნომრები წარმოადგინეს.

ელისო ქაროსანიძის განცხადებით, აქციის მიზანს სოციალურად დაუცველი და შეზღუდული შესაძლებლობის მქონე ბავშვების საზოგადოებასთან ინტეგრაცია და აღნიშნულ საქმეში სამოქალაქო საზოგადოების ჩართულობა წარმოადგენს.

შშმ ბავშვთა დღის ცენტრს „ჯადოსნურ სამყაროს“ ქუთაისის განათლების, განვითარებისა და დასაქმების ცენტრი კურირებს. ცენტრში 30-მდე ბენეფიციარი იმ უნარ-ჩვევებს ეუფლება, რაც საზოგადოებაში მათ სრულფასოვან ინტეგრაციას შეუწყობს ხელს.