იმერეთის სამხარეო სამმართველოში მამაკაცი მანქანით შევარდნას ცდილობდა

ამ წუთებში ხმაურია იმერეთის სამხარეო სამმართველოსთან. სამართალდამცავების მიერ დაკავებული შოთა ქემოკლიძის მეგობარი სამმართველოს შენობაში ავტომანქანით შესვლას ცდილობდა, რასაც სამმართველოს შენობის წინ გაჩერებული ავტომანქანების დაზიანება მოჰყვა. შოთა ქემოკლიძე პოლიციელებმა ცივი იარაღის უკანონო ტარებისთვის დააკავეს, თუმცა ის თავს უდანაშაულოდ თვლის, ხოლო პროტესტის ნიშნად სხეული სამართებლით დაიზიანა. ამის შემდეგ ბრალდებული იმერეთის სამხარეო სამმართველოს დროებითი მოთავსების იზოლატორიდან კლინიკურ საავადმყოფოში გადაიყვანეს, თუმცა აღნიშნულ სამედიცინო დაწესებულებაში მკურნალობაზე მან უარი განაცხადა, რის გამოც ექიმებმა ის გამოწერეს, ხოლო სამართალდამცავები სამხარეო სამმართველოს შენობაში აბრუნებდნენ, რა დროსაც შოთა ქემოკლიძეს სისხლდენა დაიწყო. აღნიშნულის გახმაურების შემდეგ, ბრალდებულის მეგობარი ავტომანქანით სამმართველოს შენობასთან გაჩერებულ ავტომანქანებს დაეჯახა. მამაკაცი მომხდარიდან რამდენიმე წუთში დააკავეს.