იმერეთის პოლიციაში დაშავებული მამაკაცის დედა თვითმკვლელობით იმუქრება

ბრალდებულ შოთა ქემოკლიძის დედა მანანა ბობოხიძე, რომლის შვილმაც იმერეთის სამხარეო პოლიციაში თვითდაზიანებები მიიყენა, თვითმკვლელობით იმუქრება.

შოთა ქემოკლიძეს სამართალდამცველები იარაღის უკანონო ტარებას ედავებიან, თუმცა ბრალდებულის დედის, მანანა ბობოხიძის თქმით, მისი შვილი უდანაშაულოა, დანა კი მას პოლიციელებმა ჩაუდეს.

„24 საათის განმავლობაში ჩემს შვილს პოლიციელები აკითხავდნენ და ეუბნებოდნენ, რომ პრობლემებს შეუქმნიდნენ. მე ვიცი რისი გამკეთებელია ჩემი შვილი და ამიტომ ვიცავ. მას უბანშიც კარგი მეგობრები ჰყავდა და ცუდს არ გააკეთებდა. ჯერ-ჯერობით არ ვიცი რა მდგომარეობაშია ჩემი შვილი. თუ მისი უდანაშაულობა არ დამტკიცდა, ქუთაისის ცენტრალურ მოედანზე თავს დავიწვავ“, - აცხადებს მანანა ბობოხიძე.

იმერეთის სამხარეო პოლიციაში მოქალაქე შოთა ქემოკლიძემ პროტესტის ნიშნად სხეულზე თვითდაზიანებები მიიყენა. ქემოკლიძის ადვოკატის თქმით, მისი დაცვის ქვეშ მყოფი წარსულში ნასამართლევი იყო, საპყრობილის დატოვების შემდეგ კი პოლიციელები მას ქვეყნის დატოვებას, ან უბანში ე.წ. „ჩამშვებად“ ყოფნას სთავაზობდნენ. შინაგან საქმეთა სამინისტროში აცხადებენ, რომ მამაკაცი ცივი იარაღის ტარებისთვის არის დაკავებული.