„პირი, რომელსაც გამოძიება კაცის ცემას ედავება, თურქეთში ქუთაისის სახედ იყო წარდგენილი“

ქუთაისში „ნაციონალური მოძრაობის“ საკრებულოს წევრების მტკიცებით, ქალაქის საკრებულოს უფლებაშეჩერებულ თავმჯდომარეს კვლავ ემსახურება მძღოლი, გადაადგილდება თავმჯდომარის ავტომობილით და ერიცხება ხელფასი.
საკრებულოს დეპუტატის ამირან ძოწენიძის თქმით, დათო დვალი რამდენიმე დღის წინ თურქეთში ოფიციალური ვიზიტით იმყოფებოდა.
„დათო დვალს ფორმალურად აქვს შეჩერებული საკრებულოს თავმჯდომარის უფლებამოსილება, თორემ ის ყველა იმ რესურსს იყენებს, რომელიც საკრებულოს თავმჯდომარეს ეკუთვნის. ის რამდენიმე დღის წინ თურქეთშიც იმყოფებოდა ოფიციალური ვიზიტით. სირცხვილია, პირი, რომელსაც გამოძიება კაცის ცემას ედავება, თურქეთში ქუთაისის სახედ იყო წარდგენილი. ასევე, ჩემი ინფორმაციით, დვალს ემსახურება მძღოლი, ავტომობილიც და იღებს ხელფასსაც“, - აცხადებს ძოწენიძე.
ქუთაისის საკრებულოს „ნაციონალური მოძრაობის“ დეპუტატის ბრალდებებს ქალაქის საკანონმდებლო ხელისუფლებაში პასუხობენ.
ქუთაისის საკრებულოს თავმჯდომარის მოვალეობის შემსრულებლის ნიკოლოზ ლატარიას თქმით, დათო დვალს შეჩერებული აქვს ხელფასი, ხოლო რაც შეეხება ავტომანქანით სარგებლობას, მას, როგორც რიგით დეპუტატს, უფლება აქვს ამომრჩეველთან საკრებულოს ავტომობილით გადაადგილდეს.
რაც შეეხება თურქეთში ვიზიტს, ლატარიას თქმით, ის ქვეყნის ფარგლებს გარეთ საკრებულოს რიგითი დეპუტატის რანგში იმყოფებოდა.