ბაღდათის რაიონში მდინარის ადიდების შედეგად სამანქანო გზები დაიტბორა და მოძრაობა პარალიზებულია

ბაღდათის რაიონში მდინარის ადიდების შედეგად სამანქანო გზები დაიტბორა და მოძრაობა პარალიზებულია.
მუნიციპალიტეტის გამგებლის ირაკლი გეგეშიძის თქმით, მდინარე ყვირილა კალაპოტიდან გადმოვიდა, რის გამოც სოფელი ვარციხე დაიტბორა, მანქანებით გადაადგილება კი შეუძლებელია.

„ყვირილა კალაპოტიდან გუშინ გადმოვიდა. არის გზის მონაკვეთები, სადაც გადაადგილება შეუძლებელია. მანქანები აკრძალვის მიუხედავად მაინც ცდილობენ აღნიშნულ პერიმეტრზე გასვლას, რის გამოც რამდენიმე ავტომობილი, ჩემი ინფორმაციით, წყალშია დარჩენილი. ჩვენ არანაირი ბერკეტი არ გვაქვს იმისა, რომ ყვირილა კალაპოტს დაუბრუნდეს, ეს ეტაპობრივად გამოდარების შემდეგ თუ მოხდება“, - განაცხადა გეგეძიძემ.

შეგახსენებთ, რომ იმერეთში 5 დღეა გადაუღებლად წვიმს. ძლიერი წვიმების შედეგად ასეულობით საცხოვრებელი სახლი და ათობით ქუჩა დაიტბორა. ასევე, იმერეთის მხარეში ასობით ოჯახს ელეტროენერგია არ მიეწოდება.