ქუთაისში საცხოვრებელი სახლიდან ოჯახს ასახლებენ

ქუთაისში, ავანგარდის დასახლებაში, დათიაშვილების ოჯახს საკუთარი საცხოვრებელი სახლიდან ასახლებენ.

ოჯახის წევრთა თქმით, მათ 3 მცირეწლოვანი ბავშვი ჰყავთ და წასასვლელი არსად აქვთ.

„სხვაგან წასასვლელი არსად გვაქვს. აღსრულების წარმომადგენლები დღეს დილით მოვიდნენ და მითხრეს, რომ სახლი უნდა დავტოვო. საშინელ დღეში ვარ. ბავშვებს ღამე სად გავათენებინო, არ ვიცი. იქნებ ხელისუფლების წარმომადგენლებმა ჩვენი თხოვნა გაიზიარონ და როგორმე დაგვეხმარონ“, - განაცხადეს დათიაშვილების ოჯახში.

ადგილზე იპოთეკური სესხით დაზარალებულები და პარტია „თავისუფალი საქართველოს“ წარმომადგენლები იმყოფებიან, რომლებიც აღსრულების ბიუროს ოჯახის გამოსახლების საშუალებას არ აძლევენ.